Niekalki tydniaŭ karystalniki internetu viaduć zmahańnie na staroncy ŭ fejsbuku pradpryjemstva «Savuškaŭ pradukt». Bresckija vytvorcy małaka i johurtaŭ byli tymi, chto rašuča vystupiŭ suprać biełaruskaj movy na etykietkach pradukcyi. Vytvorcy matyvavali heta tym, što raspracoŭka novaj upakoŭki pavysić sabiekošt praduktu, što pryviadzie da pavyšeńnia cenaŭ.
Na ŭsie dalejšyja zapyty i prośby kiraŭnictva «Savuškava» ŭsio adno nie idzie nasustrač svaim klijentam.
U vyniku karystalniki fejsbuka pačali zachodzić na staronku «Savuškava pradukta» i stavić svaje adznaki. Na dadzieny momant vykazałasia ŭžo 922 čałavieki. Siaredni bał «Savuškava» ŭpaŭ da 1,9 z 5. Amal 700 karystalnikaŭ pastavili minimalnuju adznaku.
Pa praviłach fejsbuka pastavić prosta adznaku mała. Treba jašče pakinuć nievialiki kamientar ab pracy pradpryjemstva. Vodhuki spažyŭcoŭ čytajucca jak zachaplalny raman. Prapanujem uvazie čytačoŭ «Našaj Nivy» nievialikuju padborku.
«Nie stanaviŭsia ni na jaki bok u łajancy z «Savuškavym praduktam», skažu prosta — mnie ŭsio roŭna, na jakoj movie napisana na ŭpakoŭcy, ale majo mierkavańnie — im nie varta było sustrakać u štyki prapanovu ź biełaruskamoŭnymi etykietkami. Hetaj pryncypovaściu jany sabie bolš imidž sapsavali, čym vyjhrali», — piša Siarhiej Uścinaŭ ź Minska.
«Za pavahu rodnaj dla nas, biełarusaŭ, movy — ruskaj — i za jakasnuju pradukcyju! Pajšła za «Savuškavym», — Elvira Mirsalimava ź Viciebska pastaviła maksimalnuju adznaku.
Mnohich spažyŭcoŭ taksama niepakoić toje, što na etykietcy małaka «Brest-Litoŭskaha» značycca data 1795 — hod apošniaha padziełu Rečy Paspalitaj.
«Zdavajciesia ŭžo, pasypajcie hałavu popiełam i rabicie biełaruskamoŭnyja etykietki. Čym chutčej, tym mienš hrošaj stracicie. Ale voś heta impierskaje h…o «Briest-Litovsk'» ja asabista ŭsio roŭna nikoli nie kuplu», — reakcyja Paŭła Siasickaha ź Viciebska.
«Ź niadaŭniaha času bajkatuju pradukcyju absalutna. Vielmi škada, što da mierkavańnia nas, spažyŭcoŭ ź Biełarusi, staviacca jak da hudzieńnia nadakučlivych much. Niepavaha zasmučaje! Kali pačniecie pisać na svajoj pradukcyi na biełaruskaj movie - skasuju bajkot», — paabiacaŭ minski juryst Aleh Ahiejeŭ.
«Raz u «Savuškava» niama hrošaj na biełaruskija etykietki — to ŭ mianie niama hrošaj na ich pradukcyju. Da pabačeńnia!» — napisaŭ Pavieł Kulik z Hrodna.
«Nie skažu, što lepšaja pradukcyja z usich, što ja kaštavaŭ, ale całkam hodnaj jakaści. Z nahody markietynhu, tak dumaju nie varta źviartać uvahi na kukareku, heta majdanutaść hałaŭnoha mozhu. U nas u krainie 2 dziarž.movy i kožny čałaviek (kožnaja arhanizacyja) maje prava vyrašać samim, na jakoj movie razmaŭlać i na jakoj movie vypuskać svaju pradukcyju», — vykazaŭsia pradstaŭnik kampanii Red Technologies Vadzim Biehieni.
«Kolki niedabitkaŭ nacyjanalistyčnych źlaciełasia) vy papularnyja) nie zvažajcie na hetuju biełAruskuju svołač», — napisaŭ prarasijski publicyst Jaŭhien Kanstancinaŭ.
«Daŭno ŭžo vyklučyła «S.P.» z asartymientu spažyvajemych małočnych praduktaŭ — addaju pieravahu bolš smačnym. Apošnim časam kuplała narezany syr «Lohki», ale čamuści łustački jaho stali tak źleplenyja z papierkami, jakija pavinny adździalać adnu łustačku ad druhoj, što zmaryłasia adlaplać i vyrašyła bolš jaho nie kuplać. A z movaju historyja vielmi niepryhožaja! Soram prosta!» — tak ličyć Śviatłana Michałoŭskaja ź Minska.
«Piać za niaźmienna vysokuju jakaść pradukcyi i adekvatnuju cenavuju palityku. Vy sapraŭdy lidar rynku. Na 500-1000 zmaharoŭ nie źviartajcie ŭvahi, jany sami pišuć i razmaŭlajuć vyklučna na ruskaj. Baraćba za łajki, praf. zmahary i niazhodnyja», — tak adznačyŭsia supracoŭnik JERAM Alaksiej Budnikaŭ.
«Pradukt jak pradukt. Pieravah nie maje. Ahresija da biełaruskaj movy — durnota. Spadziajusia, projdzie», — Maksim Rusakoŭ adzin ź niamnohich, chto pastaviŭ nie «adzinku» ci «piaciorku», a «trojku».
«Žyvu ŭ Polščy, mahu skazać, što moj polski muž śmiatanu «Savuškava» vielmi vysoka acaniŭ. Vielmi jakasnaja śmiatana, novy pradukt «Hrecki» johurt - vyšej usiakich pachvał», — vodhuk ad Natalli Jurkoŭskaj. U kamientach da svajho pasta Jurkoŭskaja raskazvaje pra kiepskuju Amieryku i Ukrainu, a taksama čarnić biełaruski nacyjanalizm.
«Darečy, vypadak z «Savuškavym» nie pieršy z padobnych. «Lidskaje piva» taksama niekatory čas badałasia sa spažyŭcami nakont biełaruskaj movy, ale zrabiła peŭnyja vysnovy z dyskusii i pačała vypuskać pradukcyju ź biełaruskim łahatypam. Bolš taho, vypuściła sieryju piva «Miensk» z roznymi datami. A ad piva «Miensk 1918» niekatorych až dziare ad złości. I zdajecca ž — ničoha, śviet nie pravaliŭsia! Piva nie ŭzdaražeła, asartymient pavialičyŭsia», — zaŭvažaje Viktar Juncevič.
«Ja z Rasii. Ale kali kampanija nie pavažaje tytulnuju movu nacyi i hrebuje intaresami biełarusaŭ, to čaho nam, rasiejcam, čakać? Niezdarma vas łavili na niajakasnaj pradukcyi. I na spažyŭcoŭ i na jakaść vam plavać. Z takim padychodam i na rasijskim rynku vam taksama zhortvacca para. U Zimbabve svajo małako pradavajcie!» — napisaŭ Juryj Hravin z Maskvy.
«Trymajciesia, isteryka hetaja chutka skončycca! Choć z nahody ekanamičnaha abhruntavańnia mahli b i bolš razumnaje niešta prydumać…» — ličyć Alaksiej Hračaninaŭ.
«Małako smačniejšaje, čym mołoko», — ličyć Andrej Šyrviel.
«Maja kotka nie jeść ničoha z «Savuškava». Jana pryvykła da małaka, a tut adno mołoko. Prapanoŭvaŭ joj ablizać upakovačku ad tvorožka, nie zhadziłasia, choča tvaražku. Žyviolinu nie padmanieš! I my bolš nie biarom», — iranizuje Siarhiej Jacevič ź Minska.
«Nie razumieju žarściaŭ vakoł nadpisaŭ na biełaruskaj movie na etykietcy… tryźnieńnie. Radavacca treba, što ŭ kvitniejučaj Biełarusi jość takaja vydatnaja kampanija jak «Savuškaŭ pradukt». I hanarycca jej. Heta nazyvajecca sapraŭdny patryjatyzm, a nie złobstvavańnie vakoł nadpisaŭ i etykietak», — vodhuk ad Aleny Kratovič ź Minska.
«Kožny pradukt musić być najpierš skiravany na patreby spažyŭcoŭ, a nie na niejkija «pryncypy» vytvorcy. A mova jość hałoŭnym čyńnikam taho, što vytvorca nasamreč dbaje pra kamfort svaich patencyjnych spažyŭcoŭ. Tamu pakul na pakunkach «Savuškava» nie źjavicca biełaruskaj movy, ja budu ihnaravać ichnuju pradukcyju. Tym bolš, što hety siehmient ekanomiki dazvalaje rabić adpaviedny vybar», — adpisaŭsia Kirył Kaścian.
«Smačnaja i jakasnaja pradukcyja! My ŭsioj siamjoj pjom MOŁOKO!» — napisała śvieckaja lvica Hanna Bond, pastaviŭšy piać bałaŭ.
«Ab staroncy «Savuškava» nie dumaju ničoha. A voś jakaść pradukcyi realna stała horšaj. Kuplaŭ i karystaŭsia pastajanna. Ciapier praktyčna nie nabyvaju. I navat nie ŭ movie tut asnoŭnaja sprava, a realna ŭ jakaści pradukcyi (adkazvaju tolki za tuju, što spažyvaju - tvaroh, kiefir, johurty)», — adznačyŭsia Juryj Frałoŭ.
Varta taksama adznačyć, što pazityŭnyja vodhuki na staroncy «Savuškava» pakidali supracoŭniki pradpryjemstva. Voś, naprykład, reakcyja ad namieśnika hienieralnaha dyrektara pa suviaziach z hramadskaściu Aleny Babkinaj.
Padobnyja vodhuki pakidali i inšyja supracoŭniki «Savuškava».
