Były prezident Hruzii i eks-kiraŭnik Adeskaj vobłaści Michaił Saakašvili straciŭ ukrainskaje hramadzianstva. Hetuju infarmacyju TSN paćvierdzili ŭ Dziaržaŭnaj mihracyjnaj słužbie Ukrainy.

Jak rastłumačyli ŭ viedamstvie, Saakašvili stračvaje hramadzianstva na asnovie p. 2 art. 19 Zakona «Ab hramadzianstvie», a mienavita — na padstavie łžyvych danych, nazvanych u ankiecie. U dakumientach, jakija zapaŭniaŭ były staršynia Adeskaj ADA, było paznačana, što jon nie znachodzicca pad śledstvam va Ukrainie abo za jaje miežami, adnak viadoma, što na terytoryi Hruzii Saakašvili byŭ zavočna aryštavany.

U mihracyjnaj słužbie adznačajuć, što z nahody hramadzianstva Saakašvili zapyt u HPU nakiravaŭ nardep Andrej Łazavy, a prakuratura źviarnułasia ŭ słužbu. I pa zapycie Kamisija pa pytańniach hramadzianstva pryniała adpaviednaje rašeńnie.

Ukrainskaje hramadzianstva Saakašvili daŭ svaim ukazam prezident Ukrainy Piatro Parašenka ŭ kancy maja 2015 hoda. Napiaredadni atrymańnia ŭkrainskaha pašparta jon byŭ pryznačany staršynioj Adeskaj abłdziaržadministracyi. U śniežni 2015 hoda jaho pazbavili hramadzianstva Hruzii.

Na pasadzie kiraŭnika Adeskaj vobłaści Saakašvili prapracavaŭ paŭtara hoda, paśla čaho abviaściŭ ab adstaŭcy, abvinavačvajučy prezidenta ŭ nievykanańni abiacańniaŭ i prasoŭvańni na kirujučyja pasady ŭ rajadministracyjach «starych karupcyjanieraŭ». Tady ž były prezident Hruzii abviaściŭ ab stvareńni ŭłasnaj palityčnaj siły, ź jakoj pojdzie na vybary va ŭkrainski parłamient.

Клас
0
Панылы сорам
0
Ха-ха
0
Ого
0
Сумна
0
Абуральна
0

Chočaš padzialicca važnaj infarmacyjaj ananimna i kanfidencyjna?