Jeŭrakamisija pryniała ŭ sieradu rašeńnie pačać farmalnuju pravierku padpisanaha ŭ aŭtorak prezidentam Polščy Andžejem Dudam zakona ab ahulnych sudach na adpaviednaść zakanadaŭstvu Jeŭrasajuza. Adpaviedny dakumient budzie nakiravany ŭ Varšavu, kali tekst zakona apublikujuć u presie, paviedamlaje DW.
Novy zakon daje ministru justycyi prava samastojna pryznačać i zvalniać staršyniaŭ sudoŭ. Krytyki reformy, siarod inšaha, papiaredžvajuć ab niebiaśpiecy ŭpłyvu kiraŭnika Miniusta na sudy i sudździaŭ. Akramia taho, zakonam praduhledžany rozny piensijny ŭzrost dla žančyn i mužčyn, što Brusiel taksama padviarhaje krytycy.
Vice-prezident Jeŭrakamisii Frans Tymiermans vitaŭ prymianieńnie Dudam svajho prava vieta ŭ dačynieńni da dvuch zakonaŭ ab rezka krytykavanaj sudovaj reformie — ab rearhanizacyi Viarchoŭnaha suda i ab Nacyjanalnym saviecie sudaŭładkavańnia. Jon padkreśliŭ, što jak tolki ŭrad pačnie zvalniać sudździaŭ Viarchoŭnaha suda, Brusiel tut ža pačnie praceduru pa 7 artykule damovy ES, jakaja praduhledžvaje sankcyi až da pazbaŭleńnia krainy-parušalnicy prava hołasu.
«My nie budzie reahavać na šantaž z boku čynoŭnikaŭ ES», — zajaviŭ aficyjny pradstaŭnik urada Polščy Rafał Bachenek, kamientujučy naviny z Brusiela. Na jaho dumku, usie zakony znachodziacca ŭ miežach kanstytucyi i demakratyčnych normaŭ.
