Biełaruskija pradpryjemstvy praciahvajuć bolš aktyŭna zvalniać supracoŭnikaŭ, čym najmać novych. U červieni arhanizacyi, pavodle aficyjnaj statystyki, pryniali na pracu 57 tysiač čałaviek, a pakazili na dźviery na 4,1 tysiačy, abo 6,8%, bolšaj kolkaści, paviedamlaje tut.by.

Bolš za ŭsio syšli ŭ minus u adukacyi, dzie ŭ červieni zvolnili na 40,4% bolš, čym uziali novych supracoŭnikaŭ. Zrešty, heta łahična: na pieryjad letnich kanikuł kolkaść zaniatych u śfiery adukacyi tradycyjna skaračajecca, vučyć-ta niama kaho.

Pradpryjemstvy, jakija akazvajuć administracyjnyja i dapamožnyja pasłuhi, zvolnili na 31,8% bolš rabotnikaŭ, čym pryniali, a kampanii, jakija zajmajucca finansavaj i strachavoj dziejnaściu, — na 29,1% bolš.

Zatoje bolš aktyŭna brali na pracu, čym zvalniali, u takich śfierach, jak achova zdaroŭja i sacyjalnyja pasłuhi (4,4%), sielskaja, lasnaja i rybnaja haspadarka (+10,6%), pramysłovaść (8%), pasłuhi pa časovym pražyvańni i charčavańni (+38,9%).

Biełaruskija pradpryjemstvy zvalniajuć bolš ludziej, čym biaruć na pracu, užo vośmy miesiac zapar. Pa źviestkach Ministerstva pracy i sacyjalnaj abarony, kolkaść zarehistravanych biespracoŭnych na kaniec červienia 2017 hoda skłała 34,2 tysiačy čałaviek.

A ŭsiaho ŭ ekanomicy Biełarusi ŭ červieni było zaniata 4344,8 tysiačy čałaviek.

Клас
0
Панылы сорам
0
Ха-ха
0
Ого
0
Сумна
0
Абуральна
0