Aktrysa Žanna Maro, adna z najvialikšych zorak francuzskaha kino, była znojdzienaja miortvaj u svajoj kvatery ŭ Paryžy. Joj było 89 hadoŭ, paviedamlaje VVS.
Prezident Francyi Emaniuel Makron skazaŭ, što Maro «ŭvasablała saboj kino» i była «navataram, jaki buntuje suprać ustanoŭlenaha paradku».
Najbolšuju viadomaść joj pryniesła rola ŭ filmie «Žul i Džym» Fransua Trufo 1962 hoda. Jana i sama ličyła hetuju pracu najlepšaj u svajoj karjery.
Aktrysa źniałasia ŭ «Jevie» Džozefa Łoŭzi ŭ 1961 hodzie. Fota AFP
Žanna Maro naradziłasia 23 studzienia 1928 hoda ŭ Paryžy, u siamji ŭpraŭlajučaha brovaram Anatola-Dezire Maro i tancorki Katryn Maro.
Karjera Maro pačałasia vielmi rana — joj nie było i 20 hadoŭ, kali jaje zaličyli ŭ trupu teatra Kamiedzi Fransez u 1947 hodzie. Adnak teatr chutka nadakučyŭ joj, i jana niekalki hadoŭ zdymałasia ŭ małabiudžetnym kino.
Z samaha pačatku krytyki nie pradkazvali Maro vialikich pośpiechaŭ, bo, pa ich dumku, jana nie adroźnivałasia charakternaj źniešnaściu ŭ paraŭnańni z papularnymi aktrysami taho času — Brydžyt Bardo i Katryn Denioŭ.
Niečakany pośpiech
U kancy 1950-ch jana źniałasia ŭ dvuch filmach režysiora Łui Mala — «Lift na ešafot» i «Paluboŭniki», jakija adrazu prynieśli joj słavu.
Paśla hetaha na aktrysu pasypalisia prapanovy ad samych znakamitych režysioraŭ. Jana źniałasia ŭ filmie «Noč» Mikiełandžeła Antanijoni razam z Marčeła Mastrajani, a taksama ŭ «Dziońniku pakajoŭki» Łuisa Buniuela.
«Mnie pašancavała — ja pryciahvała vydatnych ludziej. Jany zachaplalisia mnoju. Ja dla ich była niečym nakštałt žyvatvornaj vilhaci, jakaja spryjaje ŭschodam. Im impanavała toje, što ja niepadzielna addavałasia ŭ ich uładu i nie ŭmieła adciahvacca pamiž dublami», — kazała aktrysa pra svaju pracu z najlepšymi režysiorami taho času.
Za film «Siem dzion, siem načej» z Žanam-Polem Bielmando u 1960 hodzie jana atrymała pryz Kanskaha kinafiestyvalu.
Maro pracavała z Orsanam Uełsam i Brydžyt Bardo ŭ filmie «Viva, Maryja!» 1967 hoda. U Uełsa jana taksama źniałasia ŭ «Pracesie», «Paŭnočnych zvanach» i «Viečnaj historyi».
Maro syhrała z Brydžyt Bardo ŭ filmie «Viva, Maryja!» Fota Getty
Orsan Uełs nazyvaŭ Maro najvialikšaj aktrysaj śvietu.
Pra ŭłasnuju pracu Maro kazała tak: «Kab vykazać emocyi, ich treba čerpać u samoha žyćcia. Ja nie repieciruju da źniamohi, nie imknusia zahadzia praniknuć u rolu, ja prosta jaje abmiarkoŭvaju z režysioram i pačynaju hulać».
Jaje supracoŭnictva z Fransua Trufo było doŭhim, i ŭ vyniku źjaviŭsia adzin z najlepšych filmaŭ «novaj chvali» — «Žul i Džym», a taksama tryler «Niaviesta była ŭ čornym».
Žanna Maro sa Styvienam Śpiłbierham paśla atrymańnia ŭznaharody kinapremii Siezar ŭ 1995 hodzie. Fota Getty
U svaje filmy zorku «novaj chvali» zvali i sučasnyja režysiory: tak, naprykład, jana źniałasia ŭ Luka Biesona ŭ «Jaje zvali Nikita» ŭ 1990 hodzie i ŭ filmie Fransua Azona «Čas raźvitańnia» ŭ 2005 hodzie.
Za ŭsio žyćcio aktrysa syhrała ŭ 142 filmach.
Jana nikoli nie ličyła siabie pryhožaj i kazała, što «fizičnaja pryhažość — heta niałaska».
