U Ałabamie z akruhovaj turmy źbiehli 12 čałaviek. Vybracca na volu im dapamoh płan, u jaki ŭvachodziła arachisavaje masła, niedaśviedčanaść novaha supracoŭnika turmy i prostaja ŭdača, piša Medialeaks.
medialeaks.ru
Jak raspavioŭ šeryf akruhi Džejms Andervud, płan źniavolenych spracavaŭ z-za niadaŭna ŭziataha na pracu achoŭnika turmy. Pierad uciokami toj znachodziŭsia ŭ techničnym pakoi, dzie tranślujecca videa z usich kamier u budynku turmy. Pieraličvajučy źniavolenych pa manitorach, jon zaŭvažyŭ, što jaho prosiać adkryć adnu ź dźviarej. Akazałasia, hetyja dźviery viali z turmy, a nie ŭ adnu z kamier.
«Jany pamianiali numar nad dźviaryma, vykarystoŭvajučy arachisavaje masła (vidać, zamazali niejkija ličby abo dadali novyja), a potym zaraŭli «Hej, davaj adčyniaj dźviery», ale dźviery z hetym numaram viali na vulicu. Ničoha nie padazrajučy, achoŭnik nacisnuŭ na knopku, i jany prajšli praz hetyja dźviery», — raspavioŭ šeryf Andervud.
Andervud dadaŭ, što małady achoŭnik, jakomu treba było sačyć za 150 źniavolenymi, prosta «ździejśniŭ pamyłku».
Źniavolenyja pieraleźli praz płot, nakinuŭšy na kalučy drot koŭdry. Nichto z rabotnikaŭ i minakoŭ nie paciarpieŭ. Paranienyja byli tolki dvoje źniavolenych.
Płan, moža, i spracavaŭ, ale vidavočna nie dapamoh źniavolenym zastacca na voli: 11 z 12 biehlakoŭ užo złavili i viarnuli ŭ turmu. U biahach da hetaha času ličycca 24-hadovy Brejdzi Endru Kiłpatryk, jaki adbyvaje termin za zachoŭvańnie zabaronienych rečyvaŭ.
U turmie, darečy, na arachisavaje masła kryŭdy nie trymajuć: jaho pa-raniejšamu buduć davać źniavolenym.
