Alaksandr Łukašenka na sielektarnaj naradzie pa pytańniach uborki ŭradžaju ŭ 2017 hodzie žorstka raskrytykavaŭ čynoŭnikaŭ za pravały ŭ padrychtoŭcy da ŭboračnaj kampanii, pieradaje karespandent BiełTA.
Kiraŭnik dziaržavy źviarnuŭsia da premjer-ministra Andreja Kabiakova: «Čamu vy pryniali rašeńnie ŭrada da 20 lipienia ŭsiu techniku padrychtavać i nie prakantralavali, što technika hatovaja? Čamu milicyju nie arhanizavali? Čamu prakurora nie paprasili dapamahčy? Čamu KDK nie zadziejničali za paŭhoda? Treba było premjer-ministra klikać u rezidencyju Prezidenta, kab spytać z vas i zadačy pastavić?
Andrej Kabiakoŭ adkazaŭ, što ŭ ciapierašni čas haspadarki da ŭborki ŭradžaju ŭ asnoŭnym hatovyja, adnak u 30% arhanizacyj prablemy majuć chraničny charaktar.
«Dyk jaki ž «u asnoŭnym»? Vy nie ŭjaŭlajecie, što takoje 30% haspadarak? Kali vy sabralisia 8 młn t chleba sabrać, adkińcie 30% … Vy što, 3 młn t chleba nia źbirajeciesia siońnia źbirać? - zadaŭ pytańnie Łukašenka. - Para ŭradu vyłazić z kabinietaŭ. A vy, jak u buchhałteryi pracujecie, raskazvajecie pra statystyku niejkuju. Voś jana, statystyka, kali pajechali i pahladzieli niepasredna».
Alaksandr Łukašenka papiaredziŭ adkaznych za ŭboračnuju kampaniju členaŭ urada, kiraŭnikoŭ miascovaj viertykali ŭłady pra adkaznaść za vykanańnie pastaŭlenych zadač: «Zabiaśpiečyli haspadarki nieabchodnym. Usim, čym mahli. Napružvajem usiu krainu. A vy nie možacie traktar na miesca pastavić i pjanicu-miechanizatara da paradku zaklikać. Sieminary pravodzim, vučym kahości. kaho my vučym? Jany daŭno navučany. Staŭcie kankretnyja zadačy i realizoŭvajcie ich».
Asobna Łukašenka spyniŭsia na jakaści biełaruskaj techniki z ulikam narakańniaŭ, jakija jość u sielhasarhanizacyj. «Źbiraj svaich i pytajsia za kožny traktar, kambajn i inšuju techniku», - źviarnuŭsia jon da ministra pramysłovaści Vitala Voŭka.
Łukašenka daručyŭ pravaachoŭnym orhanam i Kamitetu dziaržaŭnaha kantrolu vyjavić i pakarać vinavatych u zryvie uboračnaj kampanii. «Kali my heta nie zrobim, heta buduć prosta razmovy, i na miescach machnuć rukami — pahavaryli i zabylisia. Ja nie zabudu. Usie vinavatyja pavinny być pryciahnuty da adkaznaści. Z 1 kastryčnika pačynajcie manitoryć i prymać miery, pytajciesia z kiraŭnikoŭ», - padkreśliŭ jon.
