Dla paskareńnia pracesu afarmleńnia darožna-transpartnych zdareńniaŭ (DTZ) estonskaja kampanija stvaryła i vypuściła mabilny dadatak E-accident, pryznačany dla zapaŭnieńnia dekłaracyj DTZ elektronnym sposabam, piša Delfi.lt.
E-accident daje kiroŭcam mahčymaść chutka zapoŭnić dekłaracyju DTZ, tak zvany «jeŭrapratakoł» i pieradać infarmacyju strachavym kampanijam. Dakumienty, jak śćviardžajecca ŭ apisańni dadatku, možna zapaŭniać na 33 movach u 46 krainach (u tym liku i ŭ Biełarusi, Litvie, Ukrainie, Polščy).
Dadatak aŭtamatyčna zachoŭvaje infarmacyju ŭ PDF-farmacie i ŭ adpaviednaści z aryhinalnaj formaj vydaje jaje dla kankretnaj krainy, u jakoj adbyłasia avaryja.
Paradak zapaŭnieńnia dekłaracyi pry dapamozie mabilnika całkam adpaviadaje paradku zapaŭnieńnia papiarovaha varyjantu. Dadatak aŭtamatyčna vyznačaje i pakazvaje miesca DTZ, datu i čas. Možna vybrać typ transpartnaha srodku, adznačyć miesca, na jakoje pryjšoŭsia pieršy ŭdar i pakazać bačnyja paškodžańni. Aproč taho, treba adlustravać schiemu DTZ i zrabić fatahrafii z paškodžańniami transpartnaha srodku.
Nasupierak zaviareńniam stvaralnikaŭ dadatku, zaraz u Biełarusi im skarystacca naŭrad ci atrymajecca.
U Biełaruskim biuro pa transpartnym strachavańni (BBTS) «Našaj Nivie» paviedamili, što ničoha nie čuli pra estonskaje novaŭviadzieńnie.
«Na dadzieny momant taki vid rehistracyi DTZ zakanadaŭča nijak nie akreśleny. U pierśpiektyvie, mahčyma, niešta padobnaje źjavicca, ale dla hetaha patrebna ŭnosić źmieny ŭ zakanadaŭstva», — raspavioŭ Viktar Łukaševič, načalnik adździeła pryjoma zajavaŭ i acenki pamieru škody BBTS.
U «Biełdziaržstrachu» taksama ničoha nie viedajuć pra E-accident, a ŭ strachavoj kampanii «B&B Insurance» skazali, što heta niemahčyma chacia b tamu, što patrebnyja podpisy abodvuch bakoŭ-udzielnikaŭ DTZ, a ličbavy podpis u našaj krainie na dadzieny momant zakanadaŭča nie zamacavany.
