U redakcyi hazety «Homielskaja pravda» (drukavany orhan Homielskaha abłvykankama i abłasnoha Savieta deputataŭ) praciahvajecca pryktyka pryniasieńnia žurnalistami klatvy viernaści.
U vypusku haziety №134 za 28 žniŭnia ŭ natatcy «Vysokaja acenka žurnalisckaj pracy» paviedamlajecca, što na redakcyjnym schodzie małady žurnalist Dźmitryj Radzivon, vypusknik fakulteta žurnalistyki Biełdziaržuniviersiteta, prynios klatvu na viernaść prafiesii i «Homielskaj praŭdzie». «Na fonie redakcyjnaha ściaha jon daŭ słova svajoj pracaj pamnažać dobruju słavu haziety, trymać u čyścini piaro žurnalista, padavać prykład zaŭsiody i paŭsiul».
Prysiaha na viernaść vydańniu praktykujecca ŭ redakcyi ź minułaha hoda.
Nahadajem, što «Homielskaja praŭda» nie raz vystupała adkazčycaj u sudach ab abaronie honaru i hodnaści pa zyskach miascovych demakratyčnych aktyvistaŭ. U sakaviku 2007 h. sud abaviazaŭ vydańnie apublikavać abviaržeńnie źviestak, što źnievažali staršyniu Homielskaj haradskoj arhanizacyi AHP Andreja Tołčyna.
U minułym kastryčniku anałahičny zysk padaŭ daradca Homielskaj haradskoj arhanizacyi BAŽ Leanid Sudalenka. Pradstaŭnica «Homielskaj praŭdy» Alena Alenčanka pahadžałasia biez sudovaha raźbiralnictva apublikavać abviaržeńnie sprečnaj infarmacyi pra jaho siamju, adnak sud adchiliŭ zysk.
Sama Alena Alenčanka ŭ 2007 hodzie atrymała zvańnie łaŭreata konkursu «Załatoje piaro» Biełaruskaha sajuza žurnalistaŭ. Mienavita na staronkach «HP» hałoŭny ideołah Homielskaj vobłaści Anatol Kaciła vykazvaŭsia nakont asablivaj roli ŚMI «ŭ prapahandysckich mietadach ideałahičnaj raboty va ŭmovach novych vyklikaŭ». «I ŭłada, razumiejučy heta, akazvaje ŭsiebakovuju dapamohu ŚMI», — cytavała słovy A. Kaciły «Homielskaja praŭda» (№ 34 za 1 sakavika 2008 h.)
