Pakul Alaksandar Łukašenka padtrymaŭ dziejańni Rasiei ŭ Paŭdniovaj Asiecii i Abchazii, ale sprabuje schavacca za «kalektyŭnym mierkavańniem», prapanavaŭšy vynieści hetaje pytańnie na pasiedžańnie ADKB, senatar Mikałaj Čarhiniec užo ŭsio za jaho rašyŭ.
Čarhiniec śćviardžaje, što Biełaruś padtrymaje ŭsiakija kroki Rasiei, u tym liku tyja, jakija pastaviać pad sumnieŭ sucelnaść nia tolki Hruzii, ale i Ŭkrainy.Prapanoŭvajem vam frahmenty Čarhincovaha interviju Eŭrazijskaj ahiencyi navinaŭ.
— Mikałaj Ivanavič, adno z najhałoŭniejšych pytańniaŭ apošnich dzion — ci pryznaje Biełaruś niezaležnaść Paŭdniovaj Asiecii i Abchazii?
— Ja nia maju sumnievaŭ, što Biełaruś dakładna i adnaznačna padtrymaje ŭsiakija kroki Rasiejskaj Federacyi, pra što i zajaviŭ Alaksandar Łukašenka na sustrečy ź Dźmitryjem Miadźviedzievym u Sočy. I my bačym pierad saboj abaviazak pačać pracu ŭ hetym napramku z našymi kalehami ŭ parlamentach krainaŭ SND.
— Ciapier abvastrajucca adnosiny nia tolki z Hruzijaj, ale i z Ukrainaj. Asabliva chvaluje prablema Krymu i rasiejskaha nasielnictva. Ciapier ukrainskaje kiraŭnictva choča pazbavić Krym statusu aŭtanomii. Na vaš pohlad, ci možna stavić pad sumnieŭ terytaryjalnuju prynaležnaść Krymu Ŭkrainie?
— Ja liču, što možna, tamu što była zroblenaja vielmi bujnaja jurydyčnaja pamyłka pry pieradačy terytoryi Krymu Ŭkrainie. Dzie zakon pra pieradaču? Dzie rašeńnie Viarchoŭnaha savietu SSSR? Heta Chruščoŭ vyrašyŭ i addaŭ. A zakonu niama.
— To bok Biełaruś moža pastavić pad sumnieŭ terytaryjalnuju cełasnaść Ukrainy?
— U dadzieny momant my ŭsie, siabry adnoj arhanizacyi SND, staim na pazycyi, što Ŭkraina musić być usio-tki siarod słavian, tamu vyjaŭlajem taktoŭnaść. Ale kali b paŭstała takoje pytańnie, to pieradusim pra heta musiła b kazać Rasieja. Bo hruba parušyli zakony Rasiejskaj Federacyi pry pieradačy hetaj terytoryi Ŭkrainie.
— Jakaja budzie pazycyja Biełarusi, kali ŭ Krymie paŭtorycca taki sama scenar, jak u Paŭdniovaj Asiecii i Abchazii?
— Heta ciažka skazać, ci buduć takija scenary, ale va ŭsiakim razie Biełaruś budzie poruč z Rasiejaj.