1 vieraśnia ŭ miežach prajekta «(Nie)rasstralanaja paezija» adbudziecca prezientacyja zbornika paezii Julija Taŭbina «Vybranaje». Układalnik knihi — Andrej Chadanovič. Redaktar — Viktar Žybul.
«Knižka voś-voś źjavicca», — paviedamiŭ na svajoj staroncy ŭ fejsbuku Andrej Chadanovič.
Prajekt «Nierasstralanaja paezija» raspačaty pa inicyjatyvie redaktara patrała «Tuzin hitoŭ» Siarhieja Budkina.
Z 1-ha vieraśnia litaratary i litaraturaznaŭcy pračytajuć 12 publičnych lekcyj, kožnaja ź jakich i končycca prezientacyjaj pieśni na słovy adnaho z paetaŭ, zabitych 29 kastryčnika 1937 hoda. Ź pieršaj lekcyjaj vystupić Andrej Chadanovič, jaki raspaviadzie pra asobu Taŭbina i prezientuje knihu «Vybranaje».
Siarod muzykaŭ, jakija ŭdzielničajuć u prajekcie — Lavon Volski, Źmicier Vajciuškievič, Kaciaryna Vadanosava, hurty Akute, Dzieciuki, Re1ikt i inšyja.
Na tvor Taŭbina pieśniu vykanaje Lavon Volski. Heta budzie vierš-pryśviačeńnie Źmitraku Astapienku, napisany ŭ 1929 hodzie ŭ Mścisłavie:
Ty pomniš
Zm. Astapienku
Ty pomniš, pomniš, biezumoŭna,
I tuju noč, i toj nastroj,
Što panavaŭ nad nami roŭna, —
I nad taboj, i nada mnoj…
Draty dryžali pieraboram,
Ab niečym dziŭnym miesiac śniŭ,
I rysy daŭniaha sabora
Tak čotka mleli ŭ vyšyni.
Niačutna šamacieła liście,
Satkali zory z srebra nić…
U tuju noč my paklalisia
Žyć i lubić… Lubić i žyć.
I my žyli… I my lubili…
I nieśli prahu i luboŭ…
Časy dziacinych snoŭ-idylij
Da nas nie viernucca iznoŭ…
Žyćcio dalej nas vieści stanie,
Nadoryć novych piesień-dum,
I mužnaj stałaści žadańni
Na nas piačatku pakładuć.
A ŭžo nie vierniecca z hadami
Ni taja noč, ni toj nastroj,
Što panavaŭ tady nad nami —
I nad taboj, i nada mnoj.
