Barbara Ahire, paciarpiełaja ad niadobrasumlennaha arandatara. Fota: Chordzi Sateras, El Mundo.
U Barsiełonie raście kolkaść skarhaŭ ad haradžan, jakija zdajuć kvatery: arandatary niezakonna pieratvarajuć ich u «haścinicy» dla turystaŭ. Naprykład, taki vypadak adbyŭsia z sužencami Alvara i Barbaraj, jakija ŭkłali damovu z hramadzianinam Biełarusi, piša El Mundo.
Kvatera ź vidam na mora, jakaja znachodzicca va ŭłasnaści ŭ pary, raźmieščana ŭ rajonie Stary horad - nadzvyčaj zapatrabavanym u zamiežnikaŭ. Tamu najmalnika siamiejnaja para, jakaja vyrašyła zdać kvateru ŭ arendu, znajšła chutka.
Źjomščykam vyjaviŭsia biełarus, jaki pradastaviŭ źviestki pra svoj zarobak i vyhladaŭ dobrym arandataram. Jany ŭkłali damovu na hod z apłataj 825 jeŭra ŭ miesiac.
Praz 15 dzion paśla padpisańnia papier susiedzi z kvatery źnizu patelefanavali Alvara i paviedamili, što ŭ ich źjavilisia charakternyja plamy na stoli — vidać, źvierchu praciakaje vanna.
Santechnikam adčyniła dźviery maładaja francužanka, jakaja skazała, što zapłaciła 200 jeŭra za noč u kvatery Alvara i Barbary. Kali majstry pryjšli ŭ druhi raz, ich sustreli ŭžo dvoje rasiejcaŭ, mužčyna i žančyna.
Narešcie, u treci raz u kvatery ŭdałosia pabyvać Barbary. Jana vyjaviła, što zamiest kušetki u haścioŭni źjaviŭsia raskładny łožak — dobraja prydumka, kab dać prytułak nie dvum, a adrazu čatyrom pastajalcam.
Žyllo pieratvaryłasia ŭ nielehalnuju turystyčnuju «haścinicu». A paśla niadoŭhich pošukaŭ u internecie jany vyjavili svaju kvateru ŭ śpisie prapanoŭ na partale Airbnb.
Rajon Barsiełony, viadomy jak Barsiełonieta, a taksama Stary horad. Fota: travellobsters.com.
Alvara i Barbara padali skarhu ŭ pravaachoŭnyja orhany i ŭ municypalitet. A taksama sprabavali źviazacca ź biełarusam, ale toj źnik.
Darečy, na partale Airbnb z profilu taho samaha biełarusa prapanoŭvalisia jašče siem takich ža «haścinic» dla turystaŭ.
Zmahacca Alvara i Barbara vyrašyli dyskredytacyjaj svajho ž žylla. I znajšoŭšy momant, kali kvatera była volnaja ad žycharoŭ, vynieśli adtul kandycyjanier, adklučyli wi-fi, pasprabavali zabłakavać zamok…
Mienavita tady z-za skarhaŭ turystaŭ, u tym liku i ŭ dačynieńni da siami inšych «haścinic», sajt Airbnb adreahavaŭ i vydaliŭ profil biełarusa, kažuć muž i žonka.
Narešcie, z Alvara i Barbaraj źviazalisia pravaachoŭniki i adnavili ich prava na karystańnie žyllom, anulavaŭšy damovu. Da taho momantu prajšło ŭžo amal čatyry miesiacy, piša El Mundo.
