Śledam za pradaŭcami filtraŭ dla ačystki vady, naładčykaŭ kampjutaraŭ, rehulataraŭ voknaŭ i realizataraŭ unikalnaj bializny, u Biełarusi źjaviŭsia novy vid machlaroŭ.
Jany spačatku telefanujuć, jak i ŭ papiarednich vypadkach, na haradski telefon i pradstaŭlajucca rabotnikami niejkich arhanizacyj (napr., «Enierhabiaśpieka»), zajaŭlajučy, što zajmajucca abśledavańniem kvater, elektraličylnikaŭ, ščytkoŭ i razietak na pradmiet ich niebiaśpieki dla žyćcia hramadzian. Naprošvajucca ŭ kvateru, zatym pakazvajuć roznyja dośledy z napružańniem, sprabujučy pierakanać haspadara padpisać damovu na akazańnie płatnych pasłuh.
«Biełenierha» papiaredžvaje spažyŭcoŭ ab vypadkach machlarstva. Adpaviednaja infarmacyja raźmieščana na aficyjnym sajcie dziaržaŭnaha vytvorčaha abjadnańnia.
Apošnim časam źjavilisia vypadki padmanu hramadzian ašukancami, jakija pradstaŭlalisia rabotnikami enierhazbytu i elektrasietak. Ašukancy, prykryvajučysia reputacyjaj enierhazabieśpiačalnych arhanizacyj («Minskenierha», «Homielenierha», «Viciebskenierha» i h.d.), naviazvajuć hramadzianam akazańnie roznych pasłuh: zamiery napružańnia ŭ elektryčnaj sietki, pravierku pravilnaści pracy ličylnika, zamienu aŭtamatyčnych vyklučalnikaŭ.
Paśla nibyta biaspłatnaha ahladu jany prapanujuć zaklučyć damovu na akazańnie płatnych pasłuh.
«U metach vyklučeńnia vypadkaŭ padmanu zaklikajem spažyŭcoŭ być pilnymi i nie paddavacca na chitryki machlaroŭ.
Źviartajem uvahu, što ŭsie biez vyklučeńnia supracoŭniki filijałaŭ «Enierhazbyt» pry naviedvańni spažyŭcoŭ elektryčnaj enierhii ŭ abaviazkovym paradku pavinny być u śpiecvopratcy i mieć pry sabie paśviedčańnie supracoŭnika filijała. dakumient pavinien źmiaščać nastupnuju infarmacyju:
numar, proźvišča, imia i imia pa baćku supracoŭnika, strukturnaje padraździaleńnie, u jakim pracuje supracoŭnik, pasada, termin dziejańnia paśviedčańnia, fatohrafiju. Paśviedčańnie ŭ abaviazkovym paradku zamacoŭvajecca piačatkaj vyšejukazanaha filijała. Supracoŭniki filijałaŭ «Enierhazbyt» nie prapanoŭvajuć zaklučyć damovu na miescy na akazańnie pasłuh», - havorycca ŭ paviedamleńni.
