Na svoj pieršy sieans Kaciaryna pryjšła razam z dačkoj Kryścinaj.
Eskiz dla debiutnaha tatu dziaŭčyna abrała vielmi ramantyčny: inicyjały svajho imia i muža Alaksieja.
«Sardečna zaprašajem na ihołku!», — žartaŭliva vitajuć Kaciarynu majstry studyi «Jerry's sailors tattoo». Sychodziačy z ułasnaha dośviedu, chłopcy viedajuć dakładna: kali čałaviek prychodzić za pieršaj tatuiroŭkaj, to ŭ 90% vypadkaŭ jon pryjdzie i za druhoj, i za treciaj… Dla kahości praces naniasieńnia malunkaŭ na cieła — prosta danina modzie. Adnak tyja, chto padychodzić da hetaha kroku śviadoma, znachodziać u im i terapiju, i mahčymaść zafiksavać važnyja žyćciovyja padziei, i vykazać reśpiekt asobnym ludziam. Padletki, naprykład, chitrujuć i prosiać baćkoŭ prezientavać tatu ŭ jakaści ŭznaharodžańnia za vydatna zdadzienyja ispyty.
Klijentu Ramanu pierakryvajuć staruju niaŭdałuju tatuiroŭku. Zamiest rycara i viežy — ryba. Dobra, što stary malunak vyliniaŭ, inakš jaho možna było b zamianić tolki na čorny kvadrat.
Kanstancin Makaroŭski zajmajecca tatuiroŭkaj 10 hadoŭ. Jašče ŭ škole jaho lubimym zaniatkam było malavańnie, jakim jon zajmaŭsia ŭ tym liku na inšych urokach, tamu chłopiec vielmi rady, što chobi ŭdałosia zrabić pracaj.
Tatu-majstar Kanstancin Makaroŭski.
Dniami i viečarami Kościa zabivaŭ cieły minčukoŭ i pryjezdžych klijentaŭ (navat na maci lileju vytatuiravaŭ), stvaraŭ klijenckuju bazu, i narešcie, hod tamu adkryŭ ułasny tatu-sałon, dzie pracuje razam z naparnikam Pašam Dubroŭskim.
Pavieł Dubroŭski.
Paša, darečy, maryŭ stać tatuiroŭščykam jašče ź dziacinstva, pakul astatnija adnakašniki źbiralisia ŭ kasmanaŭty: za bułački malavaŭ siabram hielevymi ručkami pakiemonaŭ i inšych multpiersanažaŭ. Paśpieŭ papracavać i budaŭnikom, i nastaŭnikam, ale tolki ciapier, kaža, kožnuju ranicu idzie na rabotu z uśmieškaj na vusnach, a adsutnaść vychodnych bolš nie napružvaje.
«Jerry's sailors tattoo» pranizanaja luboŭju da mora i ducham ołd-skuła. Jašče b! Svaju nazvu studyja atrymała ŭ honar Maraka Džery — Normana Kiejta Kolinsa, znakamitaha tatuiroŭščyka, jaki ličycca zasnavalnikam stylu ołd-skuł. Partrety baćki-natchnialnika razam z trosami i jakarami ŭpryhožvajuć ścieny sałona.
Jakija ž tatuiroŭki siońnia čaściej za ŭsio nabivajuć biełarusy? Raspytvajem Kościu i Pašu, pakul idzie padrychtoŭka pracoŭnaha miesca dla Kaci.
«Tut varta padzialić ludziej na niekalki ŭzrostavych hrup. U maładych papularnyja tak zvanyja partaki — tatuiroŭki, jakija śpiecyjalna robiać kryva dy ihołkaj, a nie mašynkaj. Kali raniej usie imknulisia nakałoć tatuiroŭku na niabačnym miescy, kab zastavałasia mahčymaść schavać jaje pad adzieńniem, to ciapier usio bolš prosiać «razmalavać» tvar abo šyju — heta moda pryjšła da nas z Amieryki. Darosłyja sa svaimi pieravahami zastalisia niedzie ŭ 2000-ch: jany majuć prychilnaść da kotak, abstraktnych uzoraŭ, kvietak i nadpisaŭ. Niadaŭna ja nabivaŭ chłopcu-historyku biełaruski arnamient — heta płyń stała vielmi modnaj, ale ludziej nanosiać biełaruskija vyjavy biazdumna», — raskazvaje Paša.
Niaredka ŭ chłopcaŭ z «Jerry's sailors tattoo» prosiać zrabić i intymnyja tatuiroŭki. Časam jany nastolki intymnyja, što majstry admaŭlajucca ad zamovy.
Kali naša hierainia skazała, što choča tatuiroŭku «nižej žyvata» my taksama kryšačku spužalisia, ale ŭ vyniku ŭsio atrymałasia vielmi miła — hladzicie sami.
Tatu-majstar padrychtavaŭ dla Kaci kala 50 varyjantaŭ eskizaŭ z tatu. Abrać adzin ź ich było dosyć ciažka.
Samy nizki košt tatuiroŭki ŭ sałonie — 80 rubloŭ. Zarabić na tatu-majsterstvie siońnia mahčyma, ale kankurencyja vialikaja. Biez sfarmiravanaj klijenckaj bazy nie vyžyć.
Kacia mužna ciarpieła ŭvieś praces i śćviardžała, što boli nie adčuvaje. «Naradžać kudy bolš strašna», — śmiajałasia dziaŭčyna, pakul mašynka razmaloŭvała jaje skuru.
U budučyni Kacia nie vyklučaje, što dazvolić zrabić tatu i małoj. Ale spačatku na čarzie muž, jakomu vynik vielmi spadabaŭsia. Sierhiejevy vyrašyli, što buduć tatu-siamjoj.
