U žyviołaabarončy centr «Ehida» źviarnulisia niekalki čałaviek, jakija stali śviedkami śmierci sabaki ŭ mašynie kala handlovaha centra «Prastor» u Šabanach.
Ilustracyjnaje fota.
13 žniŭnia na stajancy mašyn la kramy ŭ adnym z aŭto zaŭvažyli sabaku. Nadvorje było śpiakotnaje (+25…+27). Ludzi źviarnuli ŭvahu, što žyvioła adčuvaje siabie kiepska, sabraŭsia natoŭp.
«Vidavočcy na miescy kazali adzin adnamu, što ŭžo bolš za 20 chvilin sprabujuć šukać haspadaroŭ mašyny ŭ kramie, što telefanavali ŭ milicyju i MNS. Sabaka zvaliŭsia na padłohu, potym u jaho z rota pajšła piena i pačalisia kanvulsii», — paviedamlaje «Ehida».
Pa słovach vidavočcaŭ, u MNS admovilisia dapamahčy, milicyja vyklik pryniała, ale nichto nie pryjechaŭ.
Raźbić šyby ŭ mašynie nichto ź vidavočcaŭ nie rašyŭsia. Kali znajšlisia haspadary, žyvioła ŭžo pamierła.
Pradstaŭniki «Ehidy» nakiravali zajavy ŭ milicyju i prakuraturu, kab pryciahnuć da adkaznaści haspadaroŭ sabaki i rabotnikaŭ milicyi i MNS.
Što tyčycca ratavalnikaŭ, to, na žal, supracoŭniki MNS sapraŭdy nie abaviazany vyjazdžać na padobnyja vykliki. Z punkta hledžańnia zakanadaŭstva sabaka — heta majomaść haspadara, takaja ž, jak i aŭto, u jakim žyvioła znachodzicca. I ratavalniki nie majuć prava škodzić adnu majomaść, kab vyratavać inšuju, jak by cynična heta nie hučała.
Milicyja adkazała, što historyja, jakuju raspaviadaje «Ehida» trochi nie adpaviadaje rečaisnaści. Pa słovach milicyjantaŭ, vidavočcy nie zvanili ŭ milicyju, a źviarnulisia da achoŭnika kramy. Užo jon nabraŭ 102 i heta byŭ adziny zvanok. I milicyja nie pryjechała, bo ŭžo było pozna.
«Jak raspavioŭ načalnik adździaleńnia kryminalnaha vyšuku padpałkoŭnik milicyi Alaksiej Kruk, u 14.34 pa kanałach elektronnaj suviazi dadzienaje paviedamleńnie było pryniata. U 14.37 z zajaŭnikam źviazalisia supracoŭniki apieratyŭna-dziažurnaj słužby. Adnak jon paviedamiŭ, što dapamoha milicyi ŭžo nie patrabujecca: haspadaroŭ znajšli dziakujučy abjavie pa hučnaj suviazi ŭ hipiermarkiecie, mašynu adkryli, adnak sabaka ŭžo była miortvaja. Takim čynam, nieabchodnaść u prybyćcio naradu na miesca adpała», - paviedamlajuć milicyjanty.
Tamu nahadvajem — nie pakidajcie svaich hadavancaŭ u śpioku ŭ aŭtamabilach! U sałonie aŭto tempieratura raście vielmi chutka, a ŭ žyvioł praces termarehulacyi adroźnivajecca ad čałaviečaha.
