Syn buchhałtara prafsajuzu REP Ihara Komlika Andrej Komlik-Jamacin raskazaŭ radyjo «Svaboda», što ŭ kamery, dzie siadzić baćka, 16 čałaviek. Śledčych dziejańniaŭ ź im pakul nie viadziecca.
«Baćka piša listy. Nijakich śledčych dziejańniaŭ pakul nie viadziecca. Advakat kantaktuje ź im. Kaža, što trymajecca mužna. A sam baćka napisaŭ, što pahaliŭ vusy. U kamery, u jakoj jon utrymlivajecca ŭ SIZA na Vaładarcy, 16 čałaviek. Pryborku robiać try razy na dzień. Pa»vaładarskich» mierkach, heta jašče nia vielmi šmat: kali ja siadzieŭ praz tak zvanuju «spravu patryjotaŭ», u kamery było 30 čałaviek. Staviacca da jaho ŭ SIZA bolš-mienš pa-čałaviečy, piša baćka.
U pieršyja paru dzion była prablema ź lekami. Jamu treba niekalki razoŭ na dzień kapać admysłovyja kropli ŭ vočy. U SIZA nie chacieli lekaŭ prymać, maci damahałasia, chadziła da načalstva, i na treci dzień leki pieradali. Pieradačy prymajuć, voś i siońnia my adnieśli jamu charčy.
Źbirajemsia vypisać baćku hazety i časopisy», — raspavioŭ Svabodzie syn Ihara Komlika Andrej.
* * *
2 žniŭnia 2017 hoda supracoŭniki Departamentu finansavych raśśledavańniaŭ Kamitetu dziaržaŭnaha kantrolu Biełarusi praviali pieratrus i kanfiskacyju kamputaraŭ i finansavych dakumentaŭ u ofisie prafsajuzu REP i centralnaha ofisu BNP. Byli zatrymanyja staršynia REP Hienadź Fiadynič i buchhaltar Ihar Komlik. Fiadynič byŭ dapytany i adpuščany, a Komlik źmieščany spačatku ŭ izalatar časovaha ŭtrymańnia, a praz 3 dni — u SIZA № 1.
10 žniŭnia Iharu Komliku było vystaŭlena abvinavačvańnie pavodle artykułu 243, častki 2 («Uchileńnie ad vypłaty padatkaŭ u asabliva bujnym pamiery»). Mieru strymańnia Komliku pakinuli raniejšuju — jon zastajecca ŭ SIZA. 11 žniŭnia abvinavačvańnie vystaŭlena i Fiadyniču. Jon zastajecca na voli pad padpiskaj ab niavyjeździe. Fiadyniču i Komliku pahražaje pakarańnie ad 3 da 7 hadoŭ pazbaŭleńnia voli.
Syn Komlika Andrej Komlik-Jamacin adsiedzieŭ za kratami 100 dzion — z 21 sakavika pa 29 žniŭnia, siadzieŭ spačatku ŭ SIZA KBD, potym — u SIZA № 1. Jaho abvinavačvali pavodle častki 3 artykułu 293 Kryminalnaha kodeksu («Navučańnie i padrychtoŭka asobaŭ dla ŭdziełu ŭ masavych biesparadkach»), a taksama ŭ stvareńni niezakonnaha ŭzbrojenaha farmavańnia.
