Tolki try futbalisty zastałosia ŭ śpisie pretendentaŭ na zvańnie najlepšaha hulca Jeŭropy siezona 2016/17 pa viersii Sajuza jeŭrapiejskich futbolnych asacyjacyj (UEFA).
U šort-list uvajšli hałkipier italjanskaha «Juvientusa» Džanłuidžy Bufon, arhientynski forvard ispanskaj «Barsiełony» Lijanel Miesi i partuhalski napadajučy madrydskaha «Reała» Kryšcijanu Ranałdu. Hety śpis byŭ vyznačany pa vynikach hałasavańnia 80 trenieraŭ kłubaŭ, jakija hulali ŭ minułym siezonie ŭ Lizie čempijonaŭ i Lizie Jeŭropy, a taksama 55 žurnalistaŭ z usich krain, jakija ŭvachodziać va UEFA.
Na zvańnie najlepšaha futbalista Jeŭropy pretendujuć hulcy, jakija praviali minuły siezon u jeŭrapiejskim kłubie. Uličvajucca matčy za kłub i zbornuju na ŭnutranaj i mižnarodnaj arenach, pryčym nacyjanalnaść hulcoŭ značeńnia nie maje.
Raniej Miesi i Ranałdu pa dva razy pryznavalisia najlepšymi futbalistami Staroha Śvietu, a Bufon jašče ni razu nie atrymlivaŭ hety pryz. Uznaharoda čarhovamu łaŭreatu jeŭrapiejskaha siezona budzie ŭručana 24 žniŭnia ŭ Manaka padčas losavańnia hrupavoha etapu Lihi čempijonaŭ-2017/18. U hety ž dzień stanuć viadomyja ŭładalniki novych pryzoŭ UEFA - najlepšyja hulcy Lihi čempijonaŭ pa ampłua (bramnik, abaronca, paŭabaronca, napadajučy).
25 žniŭnia, padčas losavańnia hrupavoha raŭnda Lihi Jeŭropy budzie nazvany najlepšy futbalist hetaha turniru minułaha siezonu. Na pryz pretendujuć try pradstaŭniki pieramožcy minułaj Lihi Jeŭropy, anhlijskaha kłuba «Mančestar Junajted»: šviedski forvard Złatan Ibrahimavič, francuzski paŭabaronca Pol Pohba i jaho armianski kaleha pa ampłua Hienrych Mchitaran.
