Park vysokich technalohij - asnova IT-industryi.
Adna z najbujniejšych u śviecie aŭdytarska-kansałtynhavych kampanij Ernst & Young (EY) pradstaviła siońnia hruntoŭny ahlad (spampavać u PDF) ciapierašniaha stanu i perspektyŭ industryi infarmacyjnych technalohij u Biełarusi.
Svaboda vybrała 10 samych cikavych faktaŭ pra sektar ekanomiki, jaki raźvivajecca najbolš imklivymi tempami.
1. 115 tysiač ajcišnikaŭ
Pavodle raźlikaŭ EY, u Biełarusi siońnia zvyš 115 tysiač specyjalistaŭ sfery infarmacyjna-kamunikacyjnych technalohijaŭ (IKT). 85 tysiač ź ich zaniatyja niepasredna ŭ IKT-halinie, rešta — u inšych sektarach ekanomiki.
2. PVT — asnova IT-industryi
Siońnia 181 biełaruskaja kampanija z sukupnym štatam u 30 tysiač čałaviek — rezydenty Parku vysokich technalohijaŭ, stvoranaha ŭ 2005 hodzie prezydenckim dekretam. Kampanii-rezydenty PVT vyzvalenyja ad cpłaty ŭsich karparatyŭnych padatkaŭ, a indyvidualny padachodny padatak dla ichnich supracoŭnikaŭ maje panižanuju 9-adsotkavuju staŭku i nie ŭklučajecca ŭ sukupny hadavy prybytak.
Na dolu rezydentaŭ PVT prypadaje 28,9% prybytku IKT-sektaru i 85,7% ekspartu kamputarnych pasłuhaŭ.
3. Bolšaść kampanijaŭ — da 100 čałaviek
Pamier bolš jak 70% kampanijaŭ-rezydentaŭ PVT nie pieravyšaje 100 supracoŭnikaŭ. Pry hetym bolš za pałovu ajcišnikaŭ PVT pracujuć u bujnych kampanijach, štaty jakich pieravyšajuć 500 čałaviek.
4. Samaja vysokaapłatnaja sfera
Pa vynikach 2016 hodu siaredni zarobak u sfery IKT skłaŭ 1800 dalaraŭ — u 4,5 raza vyšej, čym ahułam pa krainie. Pavodle prahnozu EY, siaredni zarobak u PVT u 2020 hodzie dasiahnie 2,4 tysiačy dalaraŭ.
5. Samaja maładaja halina
57% supracoŭnikaŭ kampanijaŭ-rezydentaŭ PVT maładziejšyja za 30 hadoŭ. Pry hetym 49% biełaruskich ajcišnikaŭ pačali pracoŭnuju karjeru da 21 hodu. Kala 12% ajcišnikaŭ — studenty.
6. Ekspart IT-pasłuhaŭ vyras u 30 razoŭ
Jak raście ekspart IT-pasłuh ź Biełarusi. Krynica: The IT Industry in Belarus: 2017 and Beyond by EY.
Za apošnija 11 hadoŭ ekspart IT-pasłuhaŭ i praduktaŭ ź Biełarusi vyras u 30 razoŭ, dasiahnuŭšy 956,8 młn dalaraŭ (2016). Pry hetym dola IT-ekspartu ŭ ahulnym abjomie ekspartu tavaraŭ i pasłuhaŭ krainy vyrasła z 0,16% da 3,25%. Na dolu IKT prypadaje 10,5% VUP u sektary pasłuhaŭ i 5,1% ahulnaha VUP Biełarusi.
7. Samaja ekspartaaryjentavanaja halina
Bolš za 90% prodažaŭ biełaruskich IT-kampanijaŭ — za miažu. 49,1% ekspartu prypadaje na Zachodniuju Eŭropu, 43,1% — na ZŠA.
69% apytanych analitykami kampanijaŭ zarablajuć, vykonvajučy zamovy klijentaŭ (aŭtsorsinh). Mienšaść raspracoŭvaje ŭłasnyja vysokatechnalahičnyja pradukty — heta značna składaniej, ale i vyhadniej finansava. World of Tanks, MSQRD, Maps.me — viadomyja va ŭsim śviecie prahramy, prydumanyja i raspracavanyja ŭ Biełarusi.
Boeing 737-300 «Biełavija» z reklamaju kamputarnaj hulni.
8. Investycyi imkliva rastuć
Z 2011 pa 2014 hady, paviedamlaje EY, investycyi ŭ IKT-sektar vyraśli amal utraja — da 1,47 miljarda dalaraŭ. Try hałoŭnyja krainy-investary — ZŠA, Niderlandy i Rasieja.
9. Adukacyja — harantyja pośpiechu
Techničnyja dyscypliny ŭ Biełarusi vyvučajuć u VNU 75 tysiač čałaviek (24% ad ahulnaj kolkaści studentaŭ). Siarod hetych dyscyplin — 70 IT-specyjalnaściaŭ. Bolš za tracinu supracoŭnikaŭ kampanijaŭ-rezydentaŭ PVT — vypuskniki BDUIR, «hałoŭnaj ajcišnaj VNU».
IT-kampanii stvaryli 52 sumiesnyja labaratoryi ŭ 15 adukacyjnych ustanovach Biełarusi, adnak u bolšaści biełaruskich vykładčykaŭ zarobki niepraparcyjna nizkija ŭ paraŭnańni z supracoŭnikami IT-kampanijaŭ.
10. Anhielskaja mova — norma
Siońnia bolšaść kvalifikavanych biełaruskich IT-specyjalistaŭ vałodajuć anhielskaj movaj (asnoŭny srodak kamunikacyi z zamiežnymi kalehami i klijentami). Usiaho 5 hadoŭ tamu takich było zusim mała.
