Port Uść-Łuha na Bałtycy. Fota img-fotki.yandex.ru.
Prezident Rasii prapanavaŭ abaviazać biełaruskija naftapierahonnyja zavody vykarystoŭvać rasijskuju infrastrukturu dla pieravozki naftapraduktaŭ. Takuju inicyjatyvu Uładzimir Pucin ahučyŭ na naradzie pa raźvićci transpartnaj infrastruktury Paŭnočnaha Zachadu Rasii, paviedamiŭ TASS.
«Heta treba abmiarkoŭvać u bolš šyrokim farmacie. Bo na biełaruskich NPZ pierapracoŭvajecca naša nafta, inšaj tam niama i naŭrad ci źjavicca, tamu heta treba zapakietavać — atrymańnie našaj nafty ad adpaviednych pytańniaŭ vykarystańnia našaj infrastruktury», — zajaviŭ Pucin.
Kiraŭnik Rasijskaj čyhunki Aleh Biełazioraŭ paskardziŭsia prezidentu Rasii, što biełarusy admaŭlajucca ad pasłuh rasijskaj čyhunki na karyść prybałtyjskaj infrastruktury. «Nakont naftanalivu my dali 50-pracentnuju źnižku dla pieravozki ź biełaruskich zavodaŭ, ale biełaruskija zavody pakul nie vykarystoŭvajuć ni Uść-Łuhu, ni Sankt-Pieciarburh, a jeduć u respubliki Prybałtyki. My viadziem dyskusiju, jany kažuć, što ŭ ich doŭhaterminovyja kantrakty na hetuju temu zaklučany, ale my starajemsia vybudoŭvać ź imi dyjałoh», — skazaŭ Biełazioraŭ.
Abjomy zakupki rasijskaj nafty — adno z samych balučych pytańniaŭ biełaruskaj ekanomiki, jakoje moža zabiaśpiečyć jak jaje rost, tak i surjoznaje padzieńnie.
U pryvatnaści, pa dadzienych Daśledčaha centra IPM, bazavy prahnoz na 2018 hod (jon realizujecca pry pastaŭcy z Rasii 23 młn ton nafty ŭ hod) i alternatyŭny (18 młn ton). praduhledžvajuć zusim rozny pryrost VUP — 2,7% pa bazavym scenary i ŭsiaho 0,5% — pa alternatyŭnym, piša Tut.by.
U 2016 hodzie Biełaruś ekspartavała 13 młn ton naftapraduktaŭ. Užo daŭno asnoŭny tranzit biełaruskich naftapraduktaŭ ažyćciaŭlajecca praz party Litvy i Łatvii ŭ siłu hieahrafičnaj blizkaści. Rasijski bok miarkuje, što źnižeńnie taryfaŭ stymuluje pieravod naftavych hruzaŭ z prybałtyjskich partoŭ u party RF. Ułady Rasii pryniali rašeńnie da 2018 hoda spynić ekspart naftapraduktaŭ praz party Kłajpiedy (Litva), Vientśpiłsa i Ryhi (Łatvija), zahruziŭšy svaje ŭłasnyja mahutnaści na Bałtyjskim i Čornym mory (Uść-Łuha, Prymorsk i Novarasijsk).
Ale krainy Bałtyi taksama nie siadziać skłaŭšy ruki. U pryvatnaści, u pačatku hetaha hoda ŭ Minsku było adkryta pastajannaje pradstaŭnictva Łatvijskaj čyhunki, kab «spryjać supracoŭnictvu ŭ halinie čyhunačnych pieravozak i ŭmacavać supracoŭnictva ŭ śfiery tranzitu i łahistyki». Kiraŭnikom pradstaŭnictva ŁČ u Minsku stała Una Vitoła, papiaredni pradstaŭnik Ministerstva kamunikacyj Łatvii ŭ Rasii. U 2016 hodzie pa čyhuncy ź Biełarusi ŭ Łatviju było pieravieziena 15,6 młn ton hruzaŭ (u tym liku 5,4 młn ton naftapraduktaŭ, što skłała 79% usich naftanaliŭnych hruzaŭ, pieraviezienych pa łatvijskich rejkach).
