Ruskaja słužba BBC apublikavała tematyčnuju halereju «Farby leta», składzienuju ź lepšych zdymkaŭ, jakija dasłali ŭ redakcyju čytačy. Siarod pieramožcaŭ konkursa — adrazu dźvie biełaruski: Palina z Mahiloŭskaj vobłaści i Daša ź Minska.
Fota Dašy Radźkoŭskaj, www.bbc.com.
Abiedźvie dziaŭčyny dasłali vielmi pryhožyja i atmaśfiernyja zdymki. Na fota Paliny dziaŭčyna lažyć u poli z ramonkami. Na fota Dašy — słup linii elektrapieradačy pasiarod žoŭtaha rapsavaha pola.
Fota Paliny z Mahiloŭskaj vobłaści, www.bbc.com.
«Jana pieršy raz dasłała fota i adrazu stała pieramožcaj, — radujecca matula Dašy, žurnalistka Kaciaryna Barysievič. — [Daša] fatahrafuje krychu bolš za hod, zaviała instahram, ale kociki i ježa — heta nie jaje farmat, tamu prosta viadzie jaho dla siabie. Ja joj prapanavała pasłać[fota] na BBC, kab pravieryć siabie. Tym bolš, što jana ciapier źbiraje hrošy na prafiesijnuju kamieru».
Dašy Radźkoŭskaj 14 hadoŭ. Jana zakončyła vośmy kłas himnazii. Dziaŭčynka choča pajści pa śladach matuli i stać žurnalistkaj.
Na fota — vioska Ščytavičy Staradarožskaha rajona. Tam žyvie Dašyna babula. «Kali my jechali da jaje, dyk zaŭvažyli rapsavaje pole. Heta było ŭ traŭni. Kinuli rečy i viarnulisia tudy za 4 km, kab zrabić zdymki», — raspaviadaje Jeŭraradyjo Kaciaryna Barysievič.
BBC pravodzić konkurs kožny tydzień. Temy kožny raz roznyja. Naprykład, zaraz (da 17 žniŭnia) žurnalisty čakajuć ad čytačoŭ fota na temu «Chata na vioscy». Da 24 žniŭnia ŭ redakcyju BBC možna dasłać zdymki na temu «Sałodkaje», da 31 žniŭnia — «Viedy», da 7 vieraśnia — «Ciomny bok». Zdymki treba adpraŭlać pa elektronnaj pošcie na [email protected]
