Na pasiadžeńni Palitrady ADS u niadzielu siarod inšych temaŭ abmiarkoŭvalisia słovy lidera Partyi kamunistaŭ Biełaruskaj Siarhieja Kalakina ŭ interviju NN.
Nahadajem, što palityk uchvaliŭ pryznańnie Rasiejaj niezaležnaści Paŭdniovaj Asiecii i Abchazii: «Abchazija i Asiecija ničym nia horšyja za kosaŭskich albancaŭ. Kali ŭvieś śviet pryznaŭ niezaležnaść Kosava, to čamu nia moža zrabić heta ŭ dačynieńnie da hetych dziaržaŭ? Narody Abchazii i Paŭdniovaj Asiecii vykazali volu žyć u niezaležnych dziaržavach. Što tut moža być kiepskaha? Pryznańnie niezaležnaści nia tolki mahčymaje, ale i nieabchodnaje. Biełaruś taksama pavinna pryznać volu hetych narodaŭ». Jon taksama zajaviŭ, što «Ni dla koha nie sakret, što i naša kraina nabyła niezaležnaść taksama dosyć dziŭnym čynam, kali try čałavieki ŭ Biełavieskaj puščy padpisali damovu ab razvale SSSR. Mižnarodnaja supolnaść tady chucieńka pryznała Biełaruś jak asobnuju dziaržavu. Tamu, dumaju, padobnaje moža paŭtarycca i zaraz».
Jak pieradaje «Chartyja-97», ź inicyjatyvaj asudzić dadzienyja zajavy lidera kamunistaŭ vystupiła Partyja BNF. A lider arhkamitetu pa stvareńni partyi Biełaruskaja Chryścijanskaja Demakratyja Pavał Sieviaryniec zajaviŭ ab nieabchodnaści vyklučeńnia Kalakina i jahonaj partyi z składu Demakratyčnych siłaŭ. Adnak Kalakin skazaŭ, što jahonyja słovy niby byli niapravilna interpretavanyja žurnalistami, i pytańnie było źniatym z pracy dnia.
U čym interpretacyja, spadaru Kalakin? Cytatu my padali dasłoŭna, z Vašych słovaŭ, biaź niejkich aŭtarskich kamentaraŭ.
Paraŭnajcie z tym, što sp. Kalakin u toj ža dzień zajaviŭ praktyčna toje samaje ŭ tych samych słovach u interviju «Niamieckaj chvali»: «...Rośsija pośledovatielno postupajet, priznav volu narodov na niezavisimosť. Ja sčitaju, čto eto vpołnie adiekvatnyj šah, i druhije strany tožie priznajut niezavisimosť etich tierritorij, a kakije-to strany nie priznajut. ... Ja sčitaju, čto Biełaruś dołžna priznať niezavisimosť Abchazii i Južnoj Osietii».
Naturalna, čytačy i navat palityčnyja sajuźniki adčytali hetyja zajavy jak sproby spadabacca Maskvie. Usio maje svaju canu.
