Raśsielhasnahlad uvioŭ abmiežavalnyja novyja miery na pastaŭki pradukcyi ŭ Rasiju ŭ dačynieńni da čatyroch biełaruskich vytvorcaŭ praduktaŭ charčavańnia, paviedamiła rasijskaje viedamstva 17 žniŭnia.
U paviedamleńni ŭkazana, što z-za paŭtornaha vyjaŭleńnia reštkaŭ antybijotykaŭ u pradukcyi z 18 žniŭnia 2017 hoda ŭvodziacca časovyja abmiežavańni na pastaŭki ŭ Rasiju.
Pad abmiežavańni patrapili miasa ptuški AAT «Vitkonpradukt» (miasa ptuški), małako AAT «Małočnyja horki», zhuščanaje małako AAT «Rahačoŭski MKK» i suchaja małočnaja syrovatka AAT «Savuškaŭ pradukt».
Akramia taho, u dačynieńni da piaci pradpryjemstvaŭ ŭvodzicca ŭzmocnieny łabaratorny kantrol: SP TAA «Bak», SAAT «Biełaviežskija syry», AAT «Babrujski miasakambinat», AAT «Zdravuška-Miłk», AAT «Minski małočny zavod № 1».
Pry hetym u rejestry Raśsielhasnahladu, apublikavanym na sajcie viedamstva i datavanym 17 žniŭnia, dadzienaj infarmacyi — pa abmiežavańniach i ŭzmacnieńni łabaratornaha kantrolu — u dačynieńni da zhadanych pradpryjemstvaŭ niama, piša Tut.by.
Heta ŭžo nie pieršy vypadak, kali naviny Raśsielhasnahladu supiarečać «sankcyjnamu rejestru». U lutym u viedamstvie zajavili pra toje, što ŭvodziacca časovyja abmiežavańni na pastaŭki pradukcyi ŭ Rasiju pradpryjemstva AAT AFPK «Žłobinski miasakambinat». Paźniej akazałasia, što abmiežavańni ŭvodzilisia na niekalki dzion i byli źniatyja za tydzień da zajavy viedamstva.
Na pradpryjemstvach AAT «Rahačoŭski MKK» i AAT «Małočnyja horki» TUT.BY paviedamili, što nijakich aficyjnych pretenzij ad rasijskaha viedamstva nie pastupała. I ŭ Rahačovie, i ŭ Horkach taksama zajavili pra toje, što ŭpeŭnienyja ŭ jakaści svajoj pradukcyi. «Nu vy ž viedajecie, što takoje Raśsielhasnahlad», - dadali na adnym z pradpryjemstvaŭ.
U Raśsielhasnahladzie atrymać kamientar pakul nie ŭdałosia.
