Apieratyŭniki ŭpraŭleńnia kryminalnaha vyšuku HUUS Minharvykankama i Centralnaha RUUS stalicy zatrymali mužčynu, jakoha paru dzion tamu mienskaja milicyja šukała za ŭčynieńnie ciažkaha złačynstva, paviedamlaje pres-słužba HUUS Minharvykankama.
Padazravany, 1981 hoda naradžeńnia, nidzie nie pracuje, raniej nieadnarazova sudzimy za chulihanstva, kradziažy, rabavańni, niezakonny zvarot narkotykaŭ.
Pavodle infarmacyi apieratyŭnych supracoŭnikaŭ, 15 žniŭnia, pozna ŭviečary kala doma №3 pa vuł. Lenina, jon biespadstaŭna ŭdaryŭ nieznajomaha čałavieka nažom u šyju. Paciarpiełaha ŭdałosia vyratavać — jon u balnicy.
Złamyśnik niekatory čas chadziŭ kala miesca złačynstva, potym na taksi źjechaŭ na zdymnaje žyllo.
Milicyjanty, kab adšukać jaho, adsočvali zapisy kamier videanazirańnia i apytvali śviedkaŭ. Tym časam u milicyju źviarnulisia hramadzianie, jakija ŭbačyli ŭ ŚMI infarmacyju ab vyšuku padazravanaha. Tudy adrazu ž vyjechali apieratyŭniki. Mužčyna znachodziŭsia doma, dzie i byŭ zatrymany.
U milicyi jon raspavioŭ, što napiaredadni pasvaryŭsia sa svajoj dziaŭčynaj i vypiŭ zanadta šmat ałkaholu. Kankretnuju pryčynu ahresiŭnych pavodzinaŭ u dačynieńni da nieznajomaha patłumačyć nie moža, adnak svajoj viny nie admaŭlaje.
Raspačataja kryminalnaja sprava za zamach na zabojstva.
