Kandytarskaja, stvoranaja siamjoj maładych biełarusaŭ, była nazvanaja najlepšaj cukierniaj-kaviarniaj hodu ŭ polskim horadzie Hdańsku. Cukiernia Le Délice upeŭniena pieramahła ŭ hałasavańni «Čempijony smaku», arhanizavanym miascovaj hazetaj Dziennik Bałtycki. Zvańnie najlepšaj cukierni hodu — heta tolki pieršaja prystupka da kandytarskaha alimpu, Le Délice maje ambitnyja plany, kažuć ułaśniki kandytarskaj Volha i Źmicier Daŭžeŭskija.
Źmicier Daŭžeŭski, Volha Daŭžeŭskaja i viadomaja polskaja śpiavačka Sarsa Markievič (pasiaredzinie).Fota sa staronki kandytarskaj Le Délice u Facebook.
Kandytarskaja Le Délice raźmieščanaja niepadalok ad centru Hdańsku — adnaho z samych bujnych i papularnych siarod turystaŭ haradoŭ Polščy. Stvaryli jaje naprykancy 2015 hodu Volha j Źmicier Daŭžeŭskija — siamja maładych biełarusaŭ, jakija pryjechali ź Miensku. A ŭžo mienš čym praz dva hady ich kandytarskaja pieramahła ŭ konkursie na zvańnie najlepšaj cukierni polskaha horadu. Ciapier Daŭžeŭskija rychtujucca pryniać udzieł u polskich ahulnanacyjanalnych kulinarnych spabornictvach i mižnarodnych konkursach kandytaraŭ.
Kandytarskaja Le Délice ŭ Hdańsku. Fota siamji Daŭžeŭskich.
Mara stvarać deserty ŭ siamji Daŭžeŭskich była daŭno. Jany pasprabavali realizavać jaje ŭ Biełarusi, ale marudnaść i nazojlivaść biełaruskich čynoŭnikaŭ, a taksama ekanamičny kryzys prymusili ich pieranieści svoj nievialiki biznes za miažu.
Volha Daŭžeŭskaja pavodle adukacyi — inžyner-technolah. Jana skončyła Biełaruski dziaržaŭny technalahičny ŭniversytet i Mižnarodnuju kulinarnuju akademiju ŭ Kijevie, naviedvała kursy viadomych francuskich i brazylskich kandytaraŭ.
Volha zajmajecca stvareńniem desertaŭ, a vypiečkaj, a taksama ŭsimi administracyjnymi spravami zajmajecca jaje muž Źmicier — juryst pavodle adukacyi. Jak kažuć stałyja klijenty cukierni Daŭžeŭskich, jany robiać najlepšyja kruasany j francuskija bułački na ŭsim polskim uźbiarežžy. Pracoŭny dzień ułaśnikaŭ kandytarskaj pačynajecca a 4-j hadzinie ranicy j praciahvajecca až da 8-j viečara.
«Le délice» u pierakładzie z francuskaj movy aznačaje «asałoda». Siamja vyrašyła adkryć kandytarskuju ŭ francuskim styli, tamu što kandytarskaja škoła hetaj krainy ličycca najlepšaj u śviecie j «mienavita za joj budučynia» — tłumačyć Źmicier.
Desiert «forêt noire». Tut i nižej fota sa staronki kandytarskaj Le Délice u Facebook.
Biełaruska-francuskaja kandytarskaja ŭ polskim Hdańsku častuje haściej šakaladnymi tortami, šakaladnymi j fruktovymi pirožnymi. Jość u meniu j biełaruskija matyvy. Le Délice — chiba što adzinaja cukiernia ŭ Polščy, jakaja sama vyrablaje zefir.
Źmicier Daŭžeŭski: Hałoŭnyja našyja deserty — heta šakaladnyja torty ź višniaj «forêt noire» («čorny les»), trufeli, a taksama ekzatyčnyja pirožnyja sa smakam manha, marakui dy banana. Akramia taho, my padajem sezonnyja deserty — tradycyjnyja polskija pirožnyja «jahadzianki» z čarnicaj, mus na asnovie maliny, čarnic, biełaha šakaladu z aliŭkavym alejem, taksama my padajem arechavyja deserty «kaštan». Akramia ŭsiaho, my robim toje, čaho ŭ Polščy nie vyrablaje nichto — naš biełaruski zefir, jaki my hatujem na miescy.
Hdański konkurs «Čempijony smaku» (Mistrzowie Smaku) — nia pieršaje spabornictva, u jakim prymaje ŭdzieł kandytarskaja siamji Daŭžeŭskich. U hetym hodzie Le Délice pryniała ŭdzieł u konkursie Expo Sweet u Varšavie, dzie zaniała 6 miesca ŭ katehoryi smaku, i 9 — u katehoryi dekaracyi tortaŭ.
Daŭžeŭskija marać pieramahčy ŭ ahulnapolskim konkursie i patrapić na mižnarodnyja spabornictvy vytvorcaŭ desertaŭ.
Firmovy zefir
Źmicier Daŭžeŭski: My chočam zaniać pieršaje miesca na Expo Sweet, bo heta samy prestyžny konkurs u Polščy, jaki daje mahčymaść udzielničać u mižnarodnym kandytarskim konkursie ŭ italjanskim Miłanie.
Pierad pierajezdam u Polšču Źmicier analizavaŭ zakony, jakija datyčać viadzieńnia małoha biznesu, vučyŭ polskuju movu. «Mova dałasia lohka. Nieabchodnaść vyrašać administracyjnyja pytańni, spravy, źviazanyja z ramontam pamiaškańnia, prosta prymušajuć chutka navučycca havaryć pa-polsku. Ciažej za ŭsio vyrašycca na pierajezd i radykalna źmianić svajo žyćcio», — pryznajecca kandytar. Rašeńnie pierajechać u Polšču było niaprostym i tamu, što Daŭžeŭskija vychoŭvajuć traich małych dziaciej.
«Pierajechać u novuju krainu, dzie ciabie nichto nie čakaje j nie dapamahaje, z tryma dzietkami vielmi ciažka. Ale my heta zrabili, bo my šli da svajoj mary», — tłumačyć Volha Daŭžeŭskaja.
Adnak vydatki, jakija zrabiła siamja Daŭžeŭskich, kampensavalisia našmat lepšymi ŭmovami viadzieńnia biznesu ŭ Polščy, miarkuje Źmicier.
Źmicier Daŭžeŭski: U Polščy adčuvajecca toje, čaho niama ŭ Biełarusi — dziejnaść rynačnych mechanizmaŭ i pavaha da pryvatnaj ułasnaści. Kali ty staviš pierad saboj metu, tabie nia buduć pieraškadžać, nia buduć dušyć pravierkami. Kali ty sapraŭdy niešta možaš prapanavać na rynku, to vyrašać buduć klijenty — patrebny im tvoj pradukt im ci nie. Tut buduć pracavać realnyja ekanamičnyja zakony, a nie zahady planavaj ekanomiki.
Kandytarskaja Le Délice pavoli stanovicca miescam, jakaja hurtuje vychadcaŭ ź Biełarusi. Biełaruskim haściam tut rady, kaža Źmicier. Ułaśniki cukierni hatovyja padzialicca dośviedam z tymi, chto niadaŭna pierajechaŭ u Polšču, a turystam — raskazać pra cikavyja miaściny Hdańska j, kaniešnie, zaprapanavać pačastunak.
Źmicier Daŭžeŭski: My pacichu stanovimsia miescam, dzie źbirajucca miascovyja mihranty. U Hdańsku chapaje biełarusaŭ. Da nas prychodziać siabry j znajomyja, starajemsia adzin adnamu dapamahać — pačynajučy ad maralnaj padtrymki, zakančvajučy paradami pa jurydyčnych pytańniach, paradami tym, chto źbirajecca pryjechać u Polšču j prostaj dapamohaj — naprykład, pazyčajem mašynu padčas pierajezdu. Kali jość mahčymaść, my dapamahajem, nie admaŭlajem ludziam.
Źmicier i Volha Daŭžeŭskija vykazvajuć vialikuju padziaku ŭsim biełarusam, jakija ŭziali ŭdzieł u hałasavańni j padtrymali ziemlakoŭ. Jany zaprašajuć turystaŭ ź Biełarusi j biełarusaŭ Polščy ŭ svaju kandytarskuju, jakuju možna znajści na vulicy Partyzantów u Hdańsku.
Volha Daŭžeŭskaja na Sweet Expo 2017
