2 vieraśnia ŭvieś Vierchni horad pieratvorycca ŭ vialikaje hruzinskaje zastolle na 25 restaranaŭ, jakija buduć častavać hruzinskimi stravami da poŭnačy. A pakul možna padrychtavacca da «Tbilisoby» ŭ dzieviaci restaranach na hetym tydni, pakaštavaŭšy roznyja interpretacyi sučasnaj hruzinskaj kuchni.
Užo ad paniadziełka 28 žniŭnia dzieviać minskich kaviarniaŭ i baraŭ prapanujuć admysłovaje hruzinskaje mieniu. Pakaštavać usie stravy možna budzie da 2 vieraśnia. Cana kožnaha seta — 7 rubloŭ. Hruzinski set dapoŭnić blašanka hruzinskaj minieralnaj vady «Baržomi».
«Naša Niva» prapanuje pahladzieć, što smačnaha možna budzie pakaštavać napiaredadni «Tbilisoby».
«Žyhuli»
Čachachbili + šašłyčok z harodninaj
Adna z samych papularnych u śviecie hruzinskich stravaŭ. Čachachbili hatujecca z kurycy, biarecca kavałačak miasa z kostkaj. Čamu z kostkaj? Bo padčas pryhatavańnia, absmažvańnia ptuški heta daje svoj asablivy vodar. Razam ź miasam idzie rahu z harodniny: šmat cybuli, morkvy, pamidoraŭ. I, kaniečnie ž, nieparaŭnalnaja hruzinskaja zielanina. Asablivy smak čachachbili nadaje kinza. Kali budziecie častavacca šašłyčkom z harodniny, to budźcie asabliva aściarožnyja ź pierčykam čyli, dla niepadrychtavanaha spažyŭca źjeści jaho budzie niaprosta.
«Aliŭje»
Kiebab z baraniny z bulbaj i marynavanaj čyrvonaj cybulaj
Kiebab — heta nie čysta hruzinskaja kuchnia. Ale na Kaŭkazie jon hetki ž papularny, jak i ŭ arabskich krainach. U Hruzii možna sustreć i kuryny, i śviny, i jałavičny kiebab. A voś u kaviarni «Aliŭje» vyrašyli vyłučycca, zrabiŭšy kiebab z baraniny. U Biełarusi hetaje miasa krychu niedaacenienaje, chacia maje vialikuju kolkaść prychilnikaŭ. Kiebab budzie dosyć vostry, rezki, z dadavańniem kinzy, chmieli-suneli. Pa śpiecyi dla stravy kuchary «Aliŭje» admysłova jeździli na Kamaroŭski rynak. Padajecca miasa z vostrym adžykava-tamatnym sousam. Usio heta budzie viančać marynavanaja čyrvonaja cybula i śviežaja zasmažanaja bulbačka z chrabustkoj skuračkaj.
Coffeeberry
Burhier z basturmoj, brynzaj i leča
Kaviarnia Coffeeberry śpiecyjalizujecca na burhierach, robiać ich z samymi roznymi i niezvyčajnymi načynkami. Dla fiestyvalu ž ustanova zrabiła admysłovy burhier pa-hruzinsku. Mabyć, hałoŭnaj jahonaj fiškaj možna ličyć unikalny hruzinski sous sacebieli. Jon idealna pasuje da luboha miasa ci syru. «Usio pa-sapraŭdnamu, jak u Hruzii», — kaža administratar kaviarni Natalla. U jakaści syru abranaja brynza: hety syr cudoŭna spałučajecca ź piaščotnaj bułačkaj-čabataj. I, kaniečnie ž, basturma: biez hetaha miasa nie abychodzicca nivodnaje słavutaje hruzinskaje zastolle.
Don Soffe'on
Chačapury
Šef-povar kafe Eduard Cibiłaŭ sam pachodzić z Kaŭkaza, z Paŭnočnaj Asiecii. «U nas jość faktyčna anałahičnaja strava — asiecinskija pirahi. Chačapury — strava papularnaja, smačnaja, kali pravilna pryhatavać», — dzielicca ŭražańniami spadar Cibiłaŭ. Hałoŭnaja fiška hetych chačapury — ručnaja praca, pravilnyja suadnosiny načynki i ciesta. U jakaści načynki vystupaje kłasičny syr sułuhuni, a ŭžo sam šef dadavaŭ ad siabie zielaninu: krop i zialonuju cybulu.»Hruzinskaja kuchnia — heta vydatna, heta kali ŭsio śviežaje, kali šmat harodniny, zielaniny, usio kalarovaje, radasnaje. I ja niakiepska jaje hatuju, rekamienduju», — śmiajecca Eduard Cibiłaŭ.
Depo #2
Blin-chačapury
«Depo#2» na ŭvieś Minsk viadomy svaimi nieparaŭnalnymi blinčykami. Što jany mahli prapanavać svaim stałym naviedvalnikam u hruzinski tydzień? Kaniečnie, blinčyk z hruzinskim kałarytam. U jaho skład uvachodziać syry sułuhuni i macareła, masła. Asablivy kałaryt stravie nadaje jajka. U blin jano kładziecca syrym i ŭžo tolki ŭnutry prasmažvajecca. Heta robicca dla taho, kab jajka nadavała stravie bolš smaku. Heta kłasičny recept chačapury, tolki zamiest ciesta idzie blin. Voś tak pryhoža atrymałasia intehravać tradycyjnuju biełaruskuju i hruzinskuju kuchni.
«Haryšča» («Čierdak»)
Mcvadzi z kurynaha ściahna i šampińjonaŭ
Heta samaja sapraŭdnaja hruzinskaja kłasika. Mcvadzi — heta šašłyk pa-hruzinsku. Asablivuju razynku stravie nadajuć marynady. Šampińjony zamarynavanyja ŭ hruzinskim vinie, kuryca — u kiefiry z hruzinskimi śpiecyjami. U šašłyčku šmat prypravaŭ na luby husty: ad kurkumy da cimjanu. Admysłova z Tbilisi dla hetaha receptu pryvieźli svanskuju sol. «Heta pa-hruzinsku, heta prosta, heta smačna», — tłumačyć svoj vybar šef-povar «Čierdaka». Miasa ŭ hetaha šašłyčka niezvyčajna piaščotnaje.
«Charošy hod»
Bahiet z harodninaj, syram, adžykaj i šašłyčkom
U vinnym bary złučyli francuzski bahiet i tradycyjnaje hruzinskaje miasa. Dla stravy vykarystanaja zapiečanaja śvinaja vyrazka. Vielmi šmat zielaniny, vostry arechava-harodninavy sous. Usio heta zapiakajecca i padajecca ŭ razrezanym vyhladzie. «Vielmi chaciełasia, kab heta było sakavita, kožny słoj prapitany sousam, — dzielicca šef-povar Śviatłana. — Brać niešta tradycyjnaje mnie nie vielmi chaciełasia b. Chaciełasia aryhinalnaha. A jašče smačnaha, kab smačna było navat vačyma. Ubačyŭ — i zachacieŭ źjeści». Sapraŭdy, takoj stravy z francuzska-hruzinskim kałarytam vy nie pakaštujecie bolej nidzie. Stravu nazvali Karhi Tsieli — heta značyć «dobry hod» pa-hruzinsku.
«Kłumba»
Hupta z harodninaj i čypsami z łavaša
Heta nie zusim tradycyjny šašłyk. Hupta — heta hruzinskaja varyjacyja ŭsim dobra viadomych frykadelek. U porcyi — try šaryki na špažcy. U jakaści miasa była abranaja jałavičyna, pieramieleny farš z prypravami chmieli-suneli i kinzoj. Asablivaść stravy — śpiecyi i vastrynia. Da miasa idzie standartny nabor śviežaj harodniny. I ŭsio heta ź vialikaj kolkaściu niezvyčajnych čypsaŭ z łavaša. Da ich taksama padajecca damašni sous ad «Kłumby» na asnovie kietčupu dla burhieraŭ. Atrymlivajecca vielmi vialikaja i sytnaja strava.
Ciki-bar «Na plažy»
Lula-kiebab z padliŭkaj tkiemali, siezonnaja sałata z arechavaj zapraŭkaj, chatni šoci
Sakavity lula-kiebab, pryhatavany z kurynaha faršu i prypraŭleny śpiecyjami pad sousam tkiemali paraduje hurmana, jakomu padabajucca stravy z kurycy ŭ niebanalnaj interpretacyi. Sous tkiemali ŭjaŭlaje saboj harmaničnaje spałučeńnie ślivy, časnyku i travaŭ. U dadatak da hetaj stravy idzie siezonnaja sałata z vostraj zapiečanaj bulby, tamataŭ dy zielaniny roznych adcieńniaŭ smaku. Da jaho idzie arechavy sous, hranatavy sok dy śpiecyi. U dadatak da stravy padajecca śviežy šoci — hruzinski bieły chleb.
