Mahčymaść samomu vybirać pradmiety — voś što mnie najbolš padabajecca ŭ navučańni ŭ Amerykanskim universytecie. Tabie kažuć: voś dva pradmiety abaviazkovyja, voś dźvie ekanomiki, statystyčny analiz i menedžment, a astatniaje — vybirajcie sami. I vybirać jość z čaho, hladzicie jakija cikavyja pradmiety:
- State Building (Dziaržbudaŭnictva)
- Stratehii i taktyki mižnarodnych palityčnych pieramovaŭ
- Palityka ŭ kiberprastory i kiberkanflikty
- Paŭstańni i kontarpaŭstańni
- Kulturnaja i i publičnaja dyplamatyja
- Big Data albo Data Driven žurnalistyka
- Palityčny śpičrajtynh i menedžment vybarčych kampanijaŭ
Vybirać pradmiety možaš ź luboha fakultetu, nieabaviazkova sa svajho. Tak, naprykład, u minułym semestry u mianie byli kursy ŭ Škole kamunikacyi, Škole hramadzkaha kiravańnia i Biznes-škole, a ŭ hetym semestry ja maju zaniatki ŭ Škole mižnarodnych adnosinaŭ i Dziaržaŭnaha kiravańnia.
Mała taho, kali ŭ tvaim universytecie niama patrebnaha kursu, možna prajści jaho ŭ inšym universytecie Vašynhtonu biez dadatkovaj apłaty. Pamiž imi jość damova, i studenty Džordžtaŭnu, Universytetu Džordža Vašynhtana ci Amerykanskaha (dzie ŭłasna ja vučusia) hetym karystajucca. Praz dva tydni, ja spadziajusia trapić na džordžtaŭnski kurs viadomaha palitolaha Andersa Oślunda pra rynkavyja reformy ŭ postsavieckich krainach, a viasnoj - Kieneta Jałavica, byłoha ambasadara ZŠA ŭ Biełarusi, pra vyrašeńnie kanfliktaŭ va Ŭschodniaj Eŭropie i na Kaŭkazie.
A jašče, kab skončyć universytet, treba napisać dyplom, albo vykanać tak zvany «praktykum». Firmy i dziaržaŭnyja ŭstanovy zamaŭlajuć fakultetu prajekty, jakija rychtujuć studenty pad kiraŭnictvam prafesaroŭ. U sieradu ja razam z hrupaj studentaŭ pačynaju pracavać nad prajektam dla Ministerstva abarony ZŠA - pryśviečany Kitaju i Rasiei. Kaardynatar — pałkoŭnik, jaki adrazu papiaredziŭ, što cackacca nia budzie, a dedłajny — śviatoje.
