Ci daŭno my isnujem i adkul uzialisia?
Pieršyja zaniatki adbuducca 3 vieraśnia a 12-j hadzinie ŭ «Hraj Kafe» (Internacyjanalnaja, 33)
Piša kiraŭnica kursaŭ Alena Cieraškova
Kožny raz naprykancy hoda, u traŭni, niechta pytajecca: a ci možna dałučycca? I tak kryŭdna byvaje čuć, što ludzi nie viedali pra našyja kursy, a ciapier zastałosia 2-3 sustrečy — i vakacyi. Tamu ŭ hetym hodzie ja chaču raskazać pra kursy «Mova Nanova Dzietkam» usim, kamu heta cikava. Voś jany, samyja častyja pytańni pra kursy i adkazy na ich.
Biaspłatnyja siamiejnyja raźvićciova-zabaŭlalnyja kursy biełaruskaj movy «Mova Nanova Dzietkam» pracujuć u Minsku čaćviorty hod i ŭźnikli jak častka kursaŭ «Mova Nanova», z kamandaj jakich my aktyŭna supracoŭničajem. Materyjały ź dziciačych kursaŭ raźmiaščajucca na sajcie movananova.by u raździele «Dzietkam». U roznyja časy kursy pracavali ŭ Halerei «Ŭ», kniharni «Halijafy», redakcyi časopisa «Viasiołka», ciapier nas prytuliła cudoŭnaje «Hraj Kafe» na vulicy Internacyjanalnaj, 33 — histaryčny budynak, jaki mieścicca roŭna za Pałacam Respubliki, častka kolišniaj siadziby Vańkovičaŭ
Chto i kali moža da nas pryjści?
My zaprašajem dziaciej z baćkami, aryjentujemsia na ŭzrost ad 4 da 10 hod i bolšuju častku hoda pracujem, padzialiŭšysia na hrupy: daškolniki, jakija nie ŭmiejuć čytać, zvyčajna heta dzieci 4-6 hod, i daškolniki-małodšyja školniki, jakija čytajuć (6-10 hod). My radyja bačyć i tych, chto nastrojeny naviedać usie zaniatki, i tych, chto dałučajecca da nas, kab ubačyć niekatoryja jarkija imprezy ci paznajomicca z zaprošanymi haściami. Prychodzić da nas možna i ŭ siaredzinie siezona, i ŭ kancy. My nie viadziem papiaredni zapis, my nie patrabujem daviedak i spravazdač, a vakacyi majem chiba na Kalady i na Vialikdzień.
A kali dzicia jašče zusim nie viedaje movy, a darosłyja ŭžo pryzabylisia na školny kurs?
To vy idziacie ŭ słušnym kirunku! Siudy prychodziać vučycca, uspaminać i spaznavać nanoŭ. My nie krytykujem, a padkazvajem. My pracujem razam. My prapanujem vykazvacca ŭsim, ale nie prymušajem nikoha. Pryhladajciesia, kolki vam treba. Tolki prychodźcie!
Čym my zajmajemsia?
Meta kursaŭ — dać nahodu dzieciam i darosłym pahavaryć pra ŭsio na śviecie, pasvavolić i pazabaŭlacca pa-biełarusku. Prahrama kursaŭ unikalnaja, składajecca pieravažna z aŭtarskich materyjałaŭ i adaptujecca pad kankretnych ludziej (voś čamu my zacikaŭlenyja ŭ tych, chto chodzić rehularna). My adkrytyja da vašych prapanoŭ pa temach i farmacie zaniatkaŭ, dajem słova dzieciam i baćkam. Isnuje adzinaje surjoznaje i pryncypovaje abmiežavańnie: našyja kursy — terytoryja biełaruskaj movy. Heta značyć, što darosłyja ludzi prymajuć na siabie dabraachvotnaje i ščyraje abaviazacielstva padčas zaniatkaŭ karystacca biełaruskaj movaj.
A što kankretna?
Kožnyja zaniatki majuć temu. Temy roznyja, jak i na darosłych kursach. Heta moža być Vietlivaść albo Vada, Marafon albo Antarktyda, Siabroŭstva ci Ŭłaziny. My razmaŭlajem prostaj movaj pra składanyja rečy, starajemsia ŭ zvyčajnym ubačyć niezvyčajnaje, zakranajem aśpiekty zdaroŭja i marali, a časam navat razburajem mify! My hladzim prezientacyi, hulajemsia ŭ moŭnyja hulni i razvučvajem fizičnyja praktykavańni, raźniavolvajemsia, stvarajem, robim sapraŭdnyja biełaruskija rečy (vycinanki, lalki-krupienički, hlinianyja vyraby, paštoŭki, azdoblenyja cackavańniem — usiaho nie pieraličyć) i inšyja samarobki, naprykład, aryhami, roznaha kštałtu šumavyja muzyčnyja instrumienty i inšaje. Vieršy, cikavostki, čystahavorki, łaharytmičnyja praktykavańni, prykazki, prymaŭki, rebusy i kryžavanki, zadańni na łohiku, kiemlivaść dy ŭvažlivaść — 45 chvilin pralatajuć niezaŭvažna, kožny moža znajści štości cikavaje dla siabie.
A dvojki staviać?
My nie stavim adznaki! Ale, ujavicie sabie, u nas jość chatnija zadańni. Štoraz kožny navučeniec atrymlivaje drukavany arkuš, i tam vy znojdziecie i karysnaje, i cikavaje, i viasiołaje. Usio heta sprościć vam uspryniaćcie temy nastupnych zaniatkaŭ, bo šmat patrebnych słoŭ vy ŭspomnicie ci daznajeciesia napierad. Zadańni možna nie rabić. A možna rabić tolki toje, što chočacca. A možna prynieści ŭ škołu i zrabić usim kłasam ci pravieryć svaju nastaŭnicu.
Chto viadzie zaniatki?
Zaniatki pravodzić mama čaćviarych dzietak, piśmieńnica i lekar Alena Cieraškova. Joj dapamahajuć roznyja cikavyja hości.
Dyk čaho ŭ nas bolš — vučoby ci zabaŭ? — Dajcie padumać!
My ładzim supolnyja śviaty: hukajem viasnu, adznačajem Dziady balem biełaruskich niačyścikaŭ (Chełoŭin? Nie, nie čuli!), śviatkujem Kalady, ładzim vypuskny. Časam pravodzim zaniatki na volnym pavietry — hulajem u miač, šukajem pirackija skarby, malujem krejdaj na asfalcie i prosta durejem. A jakija da nas prychodziać hości! Viasioły teatr «Zialony jabłyk», ramantyčnaja fieja z «Altankaj dla čytanki», fiejeryčnaja lamcavaja batlejka «Mama Mu» i Siaržuk Markaŭ ź finskimi kazkami, nievierahodny Andruś Takindanh, unikalny Siaržuk Doŭhušaŭ, maścity Źmicier Vajciuškievič, niezabyŭnyja kamandy «Ahatka-bend» i «Dzivasił» śpiavali dla nas i razam z nami. My prydumlajem kazki razam z Alenaj Masła i Alaksiejem Šeinym, imhnienna vučym vieršy ŭśled za Andrejem Chadanovičam i Sieržam Minskievičam, tančym z Volhaj Korsak, ličym hrošy z Kryścinaj Vituška, a lekar Andrej Vituška vučyć nas nie chvareć.
Kali pieršyja zaniatki?
My čakajem dzietak ad 4 da 10 hod na našych zaniatkach u pieršuju niadzielu navučalnaha hoda — 3 vieraśnia 2017, u 12 hadzin (pieršy raz — usich razam), u «Hraj Kafe» na vulicy Internacyjanalnaj, 33 (akurat nasuprać Pałaca Respubliki, u piaci chvilinach chady ad stancyi mietro «Kastryčnickaja»). A kali hetym razam u vas nie atrymlivajecca — to ŭ lubuju inšuju niadzielu (za vyniatkam kaladnych vakacyj i dzion, na jakija prypadaje Vialikdzień). My płanujem pravieści bolš za 30 sustreč i vielmi čakajem vas! Źmieny raskłada, anonsy zaniatkaŭ i roznych mieraprajemstvaŭ adsočvajcie na našaj staroncy ŭ Fejsbuku movadzetkam.
Školnaja forma i dziońniki nie patrabujucca!
