Ź siensacyjnaj navinoj siońnia vystupiła litoŭskaje infarmacyjnaje ahienctva Delfi. Jano paviedamlaje, što padčas raskopak na hary Hiedymina ŭ Vilni, imavierna, znojdzienyja pareštki Kastusia Kalinoŭskaha.
«Majecca dastatkova dokazaŭ taho, što siarod vyjaŭlenych astankaŭ jość pareštki i Kanstancina Kalinoŭskaha», — skazaŭ BNS prafiesar Kafiedry anatomii, histałohii i antrapałohii Vilenskaha ŭniviersiteta Rymantas Jankaŭskas.
Praŭda, pakul što historyk kaža, što śćviardžać na 100%, ci heta pareštki Kalinoŭskaha — nielha. Dla hetaha treba vyvučyć usie astanki.
«Kali my nie znojdziem inšaha kandydata, ź jakim by supadała bolš dokazaŭ, to budziem śćviardžać, što heta Kalinoŭski», — padkreślivaje Jankaŭskas.
Nie tak daŭno ŭ Vilni taksama byli znojdzienyja pareštki inšaha paŭstanca — Zyhmunta Sierakoŭskaha. U tym, što heta Sierakoŭski, amal niama sumnievaŭ, bo byŭ znojdzieny jahony zaručalny piarścionak.
Kastuś Kalinoŭski — lidar paŭstańnia 1863—1864 hadoŭ na terytoryi Biełarusi i Litvy. Jahonymi namahańniami vydavałasia hazieta na biełaruskaj movie «Mužyckaja praŭda».
Kalinoŭski byŭ paviešany 22 sakavika 1864 hoda ŭ Vilni na Łukiškach. Jamu było 26 hadoŭ.
Kastuś Kalinoŭski staŭ adnym ź simvałaŭ zmahańnia biełarusaŭ za ŭłasnuju niezaležnaść i identyčnaść. Na siońnia Kalinoŭskaha maluje moładź na hrafici, majkach, nabivaje tatuiroŭki. U Minsku idzie zbor podpisaŭ za adkryćcio pomniku Kalinoŭskamu.
Zdahadki pra toje, što cieła Kalinoŭskaha mahło być pachavanaje na hary Hiedymina ŭ Vilni vykazvalisia nieadnarazova. U tym liku na staronkach «NN». Ciapier, mahčyma, heta atrymaje paćvierdžańnie.
Čytajcie taksama:
Znojdzienyja pareštki Zyhmunta Sierakoŭskaha? Pra heta śviedčyć piarścionak
Piarścionak Sierakoŭskaha, znojdzieny na hary Hiedymina FOTAFAKT
«Apošniaja mazurka ŭ Litvie»: historyja kachańnia i viernaści Zyhmunta Sierakoŭskaha i Apałonii Daleŭskaj
Jašče pra mahiłu Kalinoŭskaha — kampietentna
