U piatnicu 1 vieraśnia, kali adznačajecca Dzień viedaŭ, u Słucku adbyŭsia «Urok historyi», a taksama pierformans baćkoŭ ź dziećmi i «nastaŭnikam historyi». Słučakoŭ pavinšavali sa śviatam viedaŭ i nahadali pra hieraičny čyn ich prodkaŭ.
A 12-j hadzinie ŭ centry horada Alina Nahornaja, Aleś Puškin i jašče niekalki čałaviek raspačali pierformans «urok hieraičnaj historyi», pryśviečany miascovym padziejam 1920 hoda — Słuckamu paŭstańniu. Na «ŭroku» prysutničali dzieci. Udzielniki taksama prajšlisia z partretami paŭstancaŭ — Jurki Listapada, Makara Kraŭcova, Paŭła Žaŭryda — i ściaham Słucka pa hałoŭnaj vulicy horada, pa jakoj amal 100 hadoŭ tamu paŭstancy išli ŭ viosku Siemiežava, dzie hurtavalisia dziela abarony svajoj Radzimy i svabody.
«My heta robim, kab znoŭ nahadać słučakam pra historyju našaha słavutaha horada, — raspaviała aktyvistka abjadnańnia «Dzieja» Alina Nahornaja, jakaja vystupała ŭ roli nastaŭnicy. — Niekalki tysiač čałaviek, jakija zmahalisia za lepšuju budučyniu, siońnia zastajucca zabytymi ŭ padručnikach i ŭ publičnych miescach. A tym časam za toje, kab pomnik hierojam Słuččyny stajaŭ u Słucku, padpisalisia bolš za 1200 słučakoŭ. Užo napisana niekalki navukovych prac na temu Słuckaha paŭstańnia, praviedziena šmat navukovych daśledvańniaŭ, ale słuckija ŭłady žyvuć jašče ŭ savieckim minułym, bajacca histaryčnaj praŭdy pra baraćbu za našu dziaržaŭnaść i niezaležnaść. Jany pišuć ludziam adpiski, što, maŭlaŭ, nie chapaje «materyjałaŭ, kab abhruntavać» nieabchodnaść pomniku hierojam».
Nahadajem, što mienavita aktyvisty «Dziei» inicyjavali letaś kampaniju za ŭstalavańnie pomniku hierojam-paŭstancam u Słucku.
Fota Sieržuka Kijko
