«Siońnia ŭ Amerycy vyjšaŭ naš novy albom! Praz dva miesiacy vyjdzie na Radzimie! U nas śviata! Praca troch hadoŭ skončana!», — napisaŭ u Fejsbuku lider hurtu «Stary Olsa» Źmicier Sasnoŭski.
Užo tydzień biełaruskija muzyki hastralujuć pa ZŠA, heta ich treciaja pajezdka za akijan za apošni čas. Z prezentacyjaj albomu «Vada, chmiel i soład» jany prabuduć tam da kanca kastryčnika, majucca naviedać 15 štataŭ ad zachodniaha da ŭschodniaha ŭźbiarežžaŭ. Prahrama praduhledžvaje jak vystupy na festach, tak i solnyja kancerty, piša radyjo «Svaboda».
Paśla zaviaršeńnia amerykanskaha vajažu hurt prezentuje albom i dla svaich biełaruskich prychilnikaŭ — 19 listapada ŭ mienskim Pałacy prafsajuzaŭ.
Pavodle Źmitra Sasnoŭskaha, albom «Vada, chmiel i soład» — sproba adnavić duch staražytnaha zastolla, pakazać, jak bavili čas prodki biełarusaŭ, što śpiavali za śviatočnym stałom. Razam z tym, znajšłosia miesca ščymlivym baładam dy surjoznym histaryčnym rečam.
«Vada, chmiel i soład» — nia prosta novy albom, heta hruntoŭnaje padsumavańnie tvorčaści niekalkich apošnich hadoŭ. Volaj losu, sustreč i znachodak źbiraŭsia materyjał, apracoŭvaŭsia, kryštalizavaŭsia na kancertach. I, narešcie, jon zapisany ŭ studyi«, — padsumavali muzyki «Staroha Olsy».