U Mjanmie (raniejšaja nazva Birma) praciahvajucca sutyknieńni vajskoŭcaŭ i palicyi z musulmanskaj etničnaj hrupaj rachindža. Pa samych roznych acenkach, ciaham kanfliktu było zabita ŭžo kala 400 čałaviek.
Etničnaja hrupa rachindža žyvie na zachadzie Mjanmy, u štacie Rakchajn (Rachin). Jany trapili ŭ Mjanmu z terytoryi sučasnaj Banhładeš padčas isnavańnia Brytanskaj impieryi. Brytancy pierasialili musulman u Mjanmu, razhladajučy ich jak tannuju rabočuju siłu.
Etničnyja kanflikty pamiž rachindža i budysckim nasielnictvam Mjanmy ŭźnikali ad pačatku XX stahodździa. Paśla nabyćcia niezaležnaści Mjanmy ŭłady krainy admaŭlalisia davać musumalnam hramadzianstva, ličačy ich nielehalnymi mihrantami z Banhładeš. Uładam Banhładeš, praź pieranasielenaść krainy, mihranty z Mjanmy taksama nie duža patrebnyja. Dyj rachindža ŭ samim Banhładeš składajuć mienšaść. Bolšaść nasielnikaŭ tam — bienhały.
Štat Rakchajn paznačany žoŭtym. Hety rehijon Birmy miažuje z Banhładeš.
U 1942 hodzie adbyłasia kryvavaja rachinskaja bojnia. Kolkaść zabitych u toj čas musulmanami budystaŭ aceńvajecca ŭ niekalki dziasiatkaŭ tysiač čałaviek.
Za čas panavańnia ŭ Mjanmie vajskovaj dyktatury hety kanflikt byŭ u zamarožanym stanie. Kali ž Mjanma viarnułasia da demakratyi, to supraćstajańnie pamiž musulmanami i budystami ŭspychnuła z novaj siłaj.
Ad 1950-ch u štacie Rakchajn isnavaŭ sieparatyscki ruch za niezaležnaść rehijona. 25 žniŭnia bajcy ŭzbrojenaj hrupojki «Armija vyratavańnia rachindža Arakana» napała na vajskovyja abjekty i palicejskija pastarunki, u vyniku čaho było zabita 15 čałaviek. Varta adznačyć, što «Armija vyratavańnia rachindža Arakana» vystupaje pad radykalnymi isłamisckimi łozunhami.
U adkaz ułady Mjanmy pačali ŭzbrojenuju kampaniju suprać radykałaŭ. Mnohija isłamskija pravaabarončyja arhanizacyi nazyvajuć heta ŭžo «hienacydam» musulmanskaha nasielnictva. Ułady Banhładeš usio adno admaŭlajucca prymać uciekačoŭ z Mjanmy ŭ siabie. U zamienu hetaha jany prapanujuć zasialać rachindža na biaźludnym vostravie Tenhar Čar, jaki ŭ čas siezona daždžoŭ uvohule faktyčna całkam sychodzić pad vadu.
Naviny ź Birmy vielmi baluča pryniali ŭ musulmanskim śviecie. Padtrymku rachindža hatovyja akazvać Indanezija, Małajzija, arabskija krainy. Nie zastaŭsia ŭbaku ad padziei i kiraŭnik Čačni Ramzan Kadyraŭ. U žyvym efiry na svajoj staroncy ŭ instahramie jon vykazaŭsia pra padziei ŭ Mjanmie.
«Chaj buduć praklatyja tyja, chto ździajśniaje zabojstvy, hienacyd suprać musulman. My robim usio, što ŭ našych siłach. Kali b była maja vola i była mahčymaść, to ja b udaryŭ jadzierna pa Mjanmie. Ja b źniščyŭ tych ludziej, jakija zabivajuć dziaciej, žančyn, starych. Čamu rasijskija ŚMI pra heta maŭčać? Kali ŭ Jeŭropie zabivajuć, to našy ŚMI i palityki adrazu vystupajuć. Kali vy dumajecie, što ja zadavoleny hetym, to nie, ja zusim niezadavoleny. Kali navat Rasija budzie padtrymlivać tych šajtanaŭ, jakija siońnia ździajśniajuć złačynstvy, to ja budu suprać pazicyi Rasii. U mianie svaja pazicyja, svajo bačańnie», — skazaŭ Kadyraŭ.
U toj ža čas Rasija razam z Kitajem zabłakavała rezalucyju AAN z asudžeńniem raźni ŭ Mjanmie.
4 vieraśnia ŭ Hroznym, stalicy Čačni, prajšoŭ šmattysiačny mitynh u padtrymku musulman Birmy. Cikava, što vychodzić ludziej na vulicu zaklikaŭ i Aleh Konanaŭ — biełaruski trenier hroźnienskaha futbolnaha kłuba «Achmat».
