Elektrataksi mohuć źjavicca na vulicach Minska ŭ 2019 hodzie, paviedamiŭ BIEŁTA namieśnik hienieralnaha dyrektara pa navukovaj rabocie i inavacyjnaj dziejnaści Abjadnanaha instytuta mašynabudavańnia NAN Biełarusi Aleh Jałavy.
«Na ekśpierymientalnym uzory elektramabila my adpracujem technałahičnyja i kanstruktarskija rašeńni, kab zatym vyrabić doślednyja ŭzory roznych pa mahutnaści i pryznačeńni elektramabilaŭ. My nacelenyja pierš za ŭsio na stvareńnie elektrataksi. Heta dazvolić acanić elektramabil u haradskich umovach. My ŭžo abmiarkoŭvali heta z kiraŭnictvam Minharvykankama, i našu ideju padtrymlivajuć. Kali ŭsio pojdzie pa płanie, elektrataksi mohuć źjavicca na vulicach Minska ŭžo ŭ 2019 hodzie», — skazaŭ Aleh Jałavy.
Płanujecca, što elektrataksi buduć bolš prostym varyjantam aŭtamabilaŭ ź mienšaj mahutnaściu i buduć pryznačanyja dla pieramiaščeńnia pa Minsku i pryharadzie. «My zapuskajem i inšy prajekt, u vyniku jakoha budzie stvorany elektramabil bolšaj mahutnaści. Jaho zmohuć vykarystoŭvać słužby dastaŭki, mahčyma, ekstrannyja słužby, jon budzie prydatny dla bolš dalokich pajezdak, pieramiaščeńnia pamiž haradami. Jość zadumka stvaryć jašče i treci varyjant biełaruskaha elektramabila — niešta padobnaje da supierkara Tesla», — dadaŭ namieśnik hiendyrektara.
U Biełarusi płanujecca raspracavać i ajčynny akumulatar dla elektramabila. «My chočam zamianić lityj-ijonny akumulatar na biełaruski akumulatar z hrafienapadobnaha materyjału, jaki raspracoŭvajecca ŭ NPC pa materyjałaznaŭstvie. Jon budzie tańniejšy pa košcie i nie sastupić pa mahutnaści zarada, jakaja ŭpłyvaje na praciahłaść pracy i prabieh elektramabila», — rastłumačyŭ Aleh Jałavy.
Navukoŭcy ŭžo prystupili da pracy nad doślednymi ŭzorami elektramabila. Płanujecca, što hetyja ŭzory buduć hatovyja da śniežnia 2018 hoda, zatym projduć vyprabavańni i siertyfikacyju, a z 2019-ha ŭ Biełarusi ŭžo moža być arhanizavanaja ŭłasnaja vytvorčaść elektramabilaŭ.
