Adzin z samych šukanych italjanskich mafijozi Roka Marabita, jaki chavaŭsia ad pravaachoŭnych orhanaŭ na praciahu 23 hadoŭ, aryštavany va Uruhvai, piša VVS.
UIM
Palicyja aryštavała 50-hadovaha Marabita, adnaho z bosaŭ złačynnaj hrupoŭki Ndranhieta, u hateli stalicy Uruhvaja, Montevidea.
Pavodle danych palicyi, Marabita, pakul jaho šukała italjanskaja palicyja, žyŭ u kurortnym horadzie Punta-del-Este, karystajučysia padroblenym pašpartam. Ułady Uruhvaja śćviardžajuć, što Marabita pražyŭ u Punta-del-Este bolš za 10 hadoŭ.
U Italii Marabita abvinavačvajuć u arhanizacyi mafijoznaj hrupoŭki i kantrabandzie narkotykaŭ.
Marabita, jaki adkazvaŭ za kantrabandu narkotykaŭ z Paŭdniovaj Amieryki ŭ Italiju, nazyvali «kakainavym karalom Miłana».
Hrupoŭka Ndranhieta kantraluje značnuju častku handlu kakainam. Pavodle danych palicyi, Marabita adkazny za kantrabandu jak minimum niekalkich socień kiłahramaŭ kakainu z Brazilii ŭ Italiju.
Viła Roka Marabita ŭ kurortnym horadzie Punta-del-Este, dzie jon pražyŭ bolš za 10 hadoŭ, karystajučysia padroblenym pašpartam. Fota UIM
U chodzie pieratrusu doma Roka Marabita ŭ Punta-del-Este palicyja kanfiskavała vintoŭku kalibra 9 mm, 13 mabilnych telefonaŭ, a taksama 150 fatahrafij Marabita dla pašparta — na mnohich z hetych fatahrafij źniešnaść mafijozi była značna źmienienaja.
Taksama palicyja zatrymała žonku mafijozi.
Pa słovach advakata Marabita, jaho padabaronny z 1994 hoda žyŭ zvyčajnym žyćciom i nie byŭ źviazany z kryminalnym śvietam.
Ciapier Roka Marabita zastajecca va Uruhvai pad vartaj. Va Urhuhvai jaho vinavaciać u padrobcy dakumientaŭ. Jak čakajecca, na praciahu niekalkich miesiacaŭ Marabita budzie ekstradavany ŭ Italiju.
U studzieni minułaha hoda italjanskaja palicyja zatrymała na poŭdni krainy dvuch lidaraŭ Ndranhiety — Džuzepe Fierara i Džuzepe Krea, jakija byli ŭ biahach na praciahu 18 hadoŭ.
