Žychary šmatpaviarchovikaŭ pa vulicach Krapotkina i Viery Charužaj u Minsku bjuć tryvohu: za tydzień jak minimum piać sabak pieranieśli ciažkaje atručeńnie. U vyniku try hadavancy pamierli. Ludzi znajšli ŭ dvary kavałak liviernaj kaŭbasy ź nieviadomymi tabletkami ŭnutry, piša Tut.by.

«U sieradu ŭviečary byŭ pieršy vypadak, sabaka pamior adrazu. Na nastupny dzień pamierli jašče dva sabaki — špicy. Imhnienna ŭsio adbyłosia. U piatnicu vypadak paŭtaryŭsia, ale tam haspadynia chutka adviezła ŭ kliniku, sabaku ciapier lepš. I my ŭ subotu, paśla ranišniaj prahułki. Ciažki stan, ale spadziajomsia, što ŭsio abydziecca», — raspaviadaje minčanka Alena Juryčava.

Jaje 4,5-hadovy terjer Filip da hetaha času na kropielnicach.

Tut i nižej fota Aleny Juryčavaj

Tut i nižej fota Aleny Juryčavaj

U subotu paśla viartańnia z kliniki siamja sustreła la padjezda susiedku. I taja pakazała im dziŭnuju znachodku:

«Jaje sabaka niešta niuchaŭ u travie, žančyna padyšła pahladzieć — a tam kavałak liviernaj kaŭbasy z hetaj tabletkaj ŭnutry», — raspaviadaje Alena.

Pakul dakładna nieviadoma, što ŭtrymlivajecca ŭ tabletcy — choć jość zdahadki. Ekśpiertyzu pakul nie pravodzili. Ale haspadynia adnaho z paciarpiełych sabak užo źviarnułasia da pravaachoŭnikaŭ.

«U ciapierašni čas u Savieckim RUUS stalicy zarehistravanaja adna zajava pa pakazanym fakcie. Pravodzicca pravierka», — paviedamili ŭ pres-słužbie staličnaj milicyi.

«Sutarha, koma, spynieńnie serca»

Paśla abśledavańnia terjera ŭ klinicy, kudy źviarnułasia Alena Juryčava, pastavili mierkavany dyjahnaz: atručeńnie izanijazidam. Heta lekavy srodak dla lačeńnia tubierkulozu, i darečy, recepturny. A ŭ sabak na jaho padvyšanaja adčuvalnaść. Śpiecyjalistam viadomyja vypadki, kali preparat vykarystoŭvajuć jak jad.

— Sutarhi, sabaki prosta kamianiejuć. Dychańnie spyniajecca. Kali vieterynary zapadozryli takoje atručeńnie, to ŭkałoli antydot — pierydaksin (vitamin V6), — uspaminaje Alena. — Miarkujučy pa tym, jak staranna adrazałasia kaŭbasa i chavalisia ŭnutr tabletki, dumaju, niechta rabiŭ usio naŭmysna.

A 8-miesiačnaha spaniela Ryka vyratavać nie ŭdałosia. Jon pamior u sieradu paśla vyhułu ŭ tym ža rajonie, na vulicy Krapotkina. U ciemry sabaka niešta padabraŭ u travie, haspadynia dastała z paščy i vykinuła. Ale mabyć častku ščania ŭsio ž prahłynuła.

— Usio pačałosia, kali viarnulisia dadomu. I praz paŭhadziny sabaki nie stała. Halucynacyi, sutarha, koma, spynieńnie serca. Dva razy muž zavodziŭ sabaku serca, da nas vielmi chutka pryjechaŭ vieterynar. Tempieratura była 42. Sabaka «zhareŭ», — kaža haspadynia ščaniaci Alena Lemiašeŭskaja.

Žančynie patłumačyli, što ŭ sabaki adbyłosia mocnaje atručeńnie nieviadomym rečyvam. Pra hety vypadak siamja paśpiašałasia papiaredzić inšych uładalnikaŭ sabak, i navat raskleiła abjavy na damach.

U nastupnyja dni pamierli jašče dva sabaki: 3-hadovy špic u susiedziaŭ Aleny pa domie, a potym 8-miesiačnaje ščania špica z doma nasuprać. Pa źviestkach miascovych žycharoŭ, cieła adnoj z sabak addali na ŭskryćcio i čakajuć vynikaŭ ekśpiertyzy na praciahu miesiaca.

Atručeńnie nieviadomym rečyvam pieražyŭ i 3-hadovy terjer Ryčy ŭ čaćvier, raspaviadaje minčanka Taćciana Kartoškina.

— Praź dźvie z pałovaj hadziny paśla prahułki ŭ jaho doma rezka pačalisia sutarhi, straciŭ prytomnaść. Pohlad nieadekvatny, łapy trasucca. (…) Aprytomnieŭ, ale prosta lažyć, i vočy nie takija — nie moj sabaka! Potym pačynaje rezka biehać pa kvatery, ad mianie ŭciakać ci što. Źjaviłasia ahresija. Ja razumieju, što nam treba terminova ŭ kliniku, a jon nie dajecca. Choć zvyčajna nikoli nie kusajecca! Kali druhi prystup skončyŭsia, ja niejak padchapiła jaho i narešcie adviezła vieterynaram.

Nazaŭtra sabaka jašče padaŭ pry sprobie ŭstać na łapy. Tolki da suboty paśla «kučy ukołaŭ i kropielnic» sabaku stała lepš. Haspadynia paśla incydentu napisała zajavu ŭ milicyju.

Vieterynary: raim ciapier vyhulvać sabak tolki ŭ namordnikach

— U našu kliniku byŭ tolki adzin zvarot, i sabaku ŭdałosia vyratavać (4,5-hadovaha terjera). Ale jak my viedajem ź inšych klinik, za apošnija paŭtara tydnia było jašče 3-4 padobnyja vypadki pa ŭsim horadzie. I sabaki hinuli, — raspaviali TUT.BY u vietklinicy «Sas enimał servis». — Tamu ciapier my raim vyhulvać sabak tolki ŭ namordniku, kab jany nie mahli niešta padabrać ź ziamli.

Čym mienavita atrucilisia sabaki, skazać składana, kažuć śpiecyjalisty. Ale simptomy prykładna adnolkavyja: zaniapad sił, sutarhi, vanity, nieśviadomy stan.

— Padobnyja vypadki — vielmi chutkaja reakcyja, litaralna praz paŭhadziny žyvioła pamiraje. Prychodzili z prahułki i nie paśpiavali navat pryvieźci ŭ kliniku. Pry takich situacyjach u chatnich umovach dapamahčy niemahčyma. Patrebna ekstrannaja dapamoha, i pryniać hadavanca pavinny biez čarhi, — patłumačyli vieterynary.

Nahadajem, za žorstkaść da čaćvieranohich u Biełarusi praduhledžanaja administracyjnaja adkaznaść pa art. 15.45 KoAP i kryminalnaja pavodle art. 339-1 KK (až da 1 hoda pazbaŭleńnia voli).

Клас
Панылы сорам
Ха-ха
Ого
Сумна
Абуральна