Delfi.lt
Płany pakazać u studzieni 2018 hoda ŭ Vilni balet biełaruskaha Teatra opiery i baleta «Vitaŭt» i jaho pryviazku da prahramy stahodździa adnaŭleńnia dziaržaŭnaści Litvy źjaŭlajecca demanstracyjaj «miakkaj siły» i pravakacyjaj, śćviardžaje ministr kultury Litvy Lijana Ruakicie-Jonsan, piša Delfi.lt.
Tak ministr acaniła płany pakazać vystupleńnie trupy Nacyjanalnaha akademičnaha vialikaha teatra opiery i baleta Biełarusi ŭ arenie «Simens». U anonsie mierapryjemstva skazana, što balet «śpiecyjalna budzie pakazany da stahodździa niezaležnaści Litvy», u toj čas jak stvaralniki śpiektakla padkreślivajuć, što heta nie dakładnaje adlustravańnie histaryčnych padziej, a interpretacyja ahulnaj historyi Litvy i Biełarusi.
«Adnaznačna niehatyŭna aceńvaju sprobu arhanizataraŭ vystupu dałučycca da mierapryjemstvaŭ stahodździa adnaŭleńnia dziaržavy. Źviartaju ŭvahu, što hety vystup nijak nie źviazany z prahramaj stahodździa adnaŭleńnia Litoŭskaj dziaržavy, bolš za toje, nie atrymlivaje nijakaha finansavańnia ad ministerstva kultury», - skazała ŭ kamientary BNS ministr.
Pavodle jaje słoŭ, Litva — demakratyčnaja kraina, u jakoj možna arhanizoŭvać roznyja mierapryjemstvy. «Ale ŭsio ž, na maju asabistuju dumku, z ulikam namahańniaŭ našych uschodnich susiedziaŭ vykarystoŭvać kulturu i mastactva jak instrumienty «miakkaj siły», arhanizacyju takich mierapryjemstvaŭ prosta pierad 16 lutaha [dzień abviaščeńnia niezaležnaści ŭ 1918 h. — NN] treba razhladać jak pravakacyju», — padkreśliła ministr.
U anonsie mierapryjemstva na sajcie areny Siemens arhanizatary pakazvajuć, što pieramovy ab pakazie ŭ Vilni baleta biełaruskaha teatra išli z 2015-ha hoda, i heta budzie «padarunak Litvie ŭ suviazi sa stahodździem niezaležnaści».
Premjera śpiektakla Nacyjanalnaha akademičnaha vialikaha teatra opiery i baleta Biełarusi prajšła ŭ 2013-ym hodzie, u červieni hetaha hoda jaho pakazvali ŭ Vialikim teatry ŭ Maskvie ŭ chodzie dzion kultury Biełarusi i Rasii. U Biełarusi balet atrymaŭ uznaharodu Alaksandra Łukašenki «Za duchoŭnaje adradžeńnie». Nastupny pakaz u Minsku — 29 vieraśnia.
Biełaruski teatr padkreślivaje, što scenarysty śpiektaklu «nie sprabavali dakładna ŭznavić histaryčnyja padziei», a «pradstavili svoj pohlad na dalokaje minułaje». Teatr pakazvaje, što heta historyja pra vialikaha kniazia Vitaŭta, jaho žonku Hannu, stryječnaha brata Jahajłu i jaho žonku Jadvihu, siužet jakoj «nie pretenduje na absalutnuju peŭnaść», razhladajucca temy kachańnia, zdrady, dzie Jahajła i Vitaŭt pakazanyja jak praciŭniki, choć, jak pryznajuć, što ŭmieli i «šukali kampramisy».
«Dla scenarystaŭ było važnym zacikavić hledačoŭ historyjaj svajoj krainy», — śćviardžajuć pradstaŭniki teatra.
