U 2009 hodzie Mižnarodny Vyšahradzki Fond realizuje specyjalnuju prahramu dla Biełarusi. Prahrama prapanuje biełaruskim studentam i navukoŭcam 80 semestraŭ navučańnia ŭ lubym dziaržaŭnym ci pryvatnym universytecie krain-udzielnikaŭ Vyšahradzkaj Hrupy. Dadatkovaja infarmacyja — na sajcie.
Vyšahradzkaja Hrupa (taksama viadomaja jak Vyšahradzkaja Čaćviorka, u skaračeńni pa-anhielsku V4) źjaŭlajecca rehijanalnym sajuzam čatyroch centralnaeŭrapiejskich dziaržaŭ — Českaj Respubliki, Respubliki Vuhorščyna, Respubliki Polšča i Respubliki Słavakija.
Stvareńnie Hrupy było inicyjavana 15 lutaha 1991 h. na sustrečy prezydenta Čechasłavakii Vacłava Haŭła, prezydenta Polščy Lecha Vałensy i premjer-ministra Vuhorščyny Juzefa Antala. Paśla padziełu Čechasłavakii na dźvie niezaležnyja dziaržavy Vyšahradzkaja Hrupa stała Vyšahradzkaj Čaćviorkaj.
Ideja sustrečy 1991 hodu mienavita ŭ Vyšahradzie (paŭnočnaja častka Vuhorščyny) była natchnionaja idejaj sustrečy, jakaja prachodziła tut u dalokim 1335 h. Tady Vyšahradzki zamak prymaŭ troch palityčnych lideraŭ rehijonu — karala Bahiemii, karala Vuhorščyny i karala Polščy. Taja sustreča stała padmurkam dla mirnaha isnavańnia i sumiesnaj ekanamičnaj palityki troch dziaržaŭ.
Stvareńnie Vyšahradzkaj Hrupy u 1991 hodzie asnoŭvałasia na pryncypach salidarnaści i ahulnych kaštoŭnaściaŭ, takich jak sučasnaja pravavaja dziaržava, parlamenckaja demakratyja i rynkavaja ekanomika.
U 2004 hodzie čatyry dziaržavy Vyšahradzkaj Hrupy stali členami Eŭrapiejskaha Sajuzu. Paśla dasiahnieńnia hetaj klučavoj mety — uvachodu krain u eŭrastruktury — Vyšahradzkaja Hrupa pačała raspracoŭvać i ažyćciaŭlać sumiesnuju palityku ŭ dačynieńni da susiednich dziaržaŭ, padzielenych kaliści «žaleznaj zasłonaj». Pryjarytetam dziejnaści stali dziaržavy, jakija biaruć udzieł u Eŭrapiejskaj palitycy dobrasusiedztva, a taksama dziaržavy za ŭschodnimi miežami Hrupy, takija jak Biełaruś, Ukraina i krainy zachodniaj častki Bałkanaŭ.
Mižnarodny Vyšahradzki Fond byŭ zasnavany ŭ 2000 hodzie ŭ jakaści adzinaj instytucyi Vyšahradzkaj Hrupy, misijaj jakoha było finansavańnie roznych prajektaŭ u halinie kultury, adukacyi, navukovaha abmienu, abmienu moładździu, prymiežnaha supracoŭnictva i papularyzacyi turyzmu. Na dadzieny momant dziejničaje 4 prahramy hrantaŭ, 3 adukacyjnyja prahramy i tvorčaja prahrama, jakija realizujucca ŭ 11 terminach.
Hałoŭnymi ŭdzielnikami hrantavych prahram źjaŭlajucca niaŭradavyja niekamercyjnyja arhanizacyi, municypalitety i asobnyja hramadzianie. Vyšahradzkaja Hrupa nie maje sakrataryjatu, a jaje dziejnaść kaardynujecca ministrami zamiežnych spraŭ. Adzinaj instytucyjaj źjaŭlajecca Mižnarodny Vyšahradzki Fond. Fond byŭ zasnavany ŭradami čatyroch krain-udzielnikaŭ 9 červienia 2000 hodu. Hałoŭnaj metaj Fondu źjaŭlajecca dziejnaść, skiravanaja na raźvićcio supracoŭnictva krain Vyšahradzkaj Hrupy ź vializarnym rehijonam Centralnaj i Ŭschodniaj Eŭropy, a taksama zachodnich Bałkanaŭ. Biudžet Fondu składaje 5 młn eŭra i składajecca z unioskaŭ krain-udzielnikaŭ Hrupy.
Ad 2007 hodu Fond prapanuje prahramu Vyšahradzkich Universyteckich hrantaŭ (Visegrad University Studies ci Curriculum Program) metaj jakoj źjaŭlajecca raźvićcio i palapšeńnie ŭniversyteckich adnosinaŭ i prahram u Vyšahradzkim rehijonie.
Bolš za toje, Fond realizuje adukacyjnyja prahramy nia tolki dla zacikaŭlenych asobaŭ z krain Hrupy, ale i dla navučencaŭ z nastupnych krain: Albanija, Armienija, Azerbajdžan, Biełaruś, Bośnija i Hiercahavina, Charvatyja, Hruzija, Makiedonija, Čarnahoryja, Rasija, Serbija dy Ŭkraina. Ad 2003 hodu bolš za 500 navučalnych vizytaŭ roznaha ŭzroŭniu było finansavana Vyšahradzkim Fondam. Navučency z krainaŭ, jakija nie ŭvachodziać u Vyšahradzkuju Hrupu, mohuć svabodna abirać dziaržaŭnuju ci pryvatnuju vučelniu (zarehistravanuju ŭ Ministerstvie Adukacyi) u luboj z krain Hrupy.
