«Moładź BNF» atrymała adkaz na zvarot u Zelvienski rajvykankam Haradzienskaj vobłaści nakont pierajmienavańnia adnoj z vulicaŭ miastečka Zelvy ŭ honar paetki Łarysy Hienijuš. U pierajmienavańni, jak i letaś, admovili, ale paabiacali razhladzieć prapanovu «pry nieabchodnaści nazyvańnia novaj vulicy», piša Radyjo Svaboda.
Zvaroty da ŭładaŭ Zelvy ab vulicy Hienijuš nia raz rabilisia raniej, ale zaŭsiody na ich adkazvali admovaj. U 2010 hodzie ŭłady admaŭlali nadać vulicy Savieckaj imia Hienijuš, bo «dla bolšaści žycharoŭ słova «Savieckaja» źjaŭlajecca važnym histaryčnym paniaćciem, asacyjujecca ź ich maładościu i ŭpeŭnienaściu ŭ zaŭtrašnim dni».
Ciapier miascovyja ŭłady adkazali «Moładzi BNF», što pierajmianoŭvać užo isnuju vulicu niemetazhodna, bo «heta moža paciahnuć za saboj niekatoryja niazručnaści jak dla žycharoŭ vulicy, jakim pryjdziecca prajści rehistracyju ŭ hrupie hramadzianstva i mihracyi milicyi hramadzkaj biaśpieki adździeła ŭnutranych spraŭ rajonu, a taksama pieraaformić šerah dakumentaŭ; tak i dla ŽKH i Biełpošty».
U «Moładzi BNF» zaznačyli, što razumiejuć heta, ale ŭpeŭnienyja, što ŭšanavać pamiać Łarysy Hienijuš na jaje radzimie ŭsio roŭna varta. Tamu jak alternatyŭny (i ekanomny) varyjant prapanavali pastavić pomnik Hienijuš na centralnaj płoščy miastečka i zapuścili anłajn-petycyju za ŭstanoŭku pomnika.
Pomnik-biust Łarysie Hienijuš staić na ćvintary Śviata-Troickaj carkvy ŭ Zelvie, inšym čynam pamiać Hienijuš u miastečku nie ŭšanavanaja.
Čytajcie taksama:
Viarchoŭny sud: Hienijuš nie moža być reabilitavanaja, bo «akazvała dapamohu mižnarodnaj buržuazii» i «ŭdzielničała ŭ antysavieckich arhanizacyjach»
Viktar Marcinovič: Ci reabilitavali Kastusia Kalinoŭskaha?
