Mahiloŭski abłasny sud pryznaŭ 27-hadovaha žychara vioski Amchovaja-1 Mahiloŭskaha rajona vinavatym u žorstkim zabojstvie 4-hadovaj dački sužycielki i prysudziŭ da 20,5 hoda pazbaŭleńnia voli ŭ kałonii ŭzmocnienaha režymu. Ihar Burdoŭ da śmierci źbiŭ dzicia. Dziaŭčynka pamierła ŭ balnicy, piša Tut.by.
Sud pryznačyŭ Iharu Burdovu takoje ž pakarańnie, jak prasiŭ prakuror — 20 hadoŭ i 6 miesiacaŭ pazbaŭleńnia voli ŭ kałonii ŭzmocnienaha režymu. Jon taksama pa rašeńni suda musić vypłacić maci dziaŭčynki 10 tysiač rubloŭ maralnaj kampiensacyi.
Uviečary 30 sakavika ŭ vioscy Amchovaja-1 dziaŭčynka zastałasia doma z mužčynam. Maci była na pracy. Pa słovach Burdova, małaja jaho nie słuchałasia. Tamu jon jaje pakaraŭ i syšoŭ — pa jaho słovach, na pracu. Dzicia ŭsiu noč było adno, a ranicaj mužčyna viarnuŭsia i pabačyŭ dziaŭčynku biez prytomnaści i vyklikaŭ chutkuju dapamohu. Na toj momant abvinavačany byŭ pjany.
Pa materyjałach spravy, mužčyna biŭ dziaŭčynku rukami, nahami, abutymi ŭ pakajovyja tapki, ramianiom ź mietaličnaj spražkaj i inšym nieŭstanoŭlenym pradmietam pa roznych častkach cieła. Śpiecyjalisty ličać, što dzicia atrymała nie mienš za 50 udaraŭ, u tym liku nie mienš za 13 ź ich — u hałavu.
Ź ciažkimi traŭmami dziaŭčynku dastavili ŭ reanimacyju abłasnoj dziciačaj balnicy, dzie zrabili trepanacyju čerapa. Adnak vyratavać jaje žyćcio nie ŭdałosia. U dačynieńni da Burdova raspačali kryminalnuju spravu.
Razhlad pačaŭsia ŭ abłasnym sudzie 25 žniŭnia. Abvinavačany skazaŭ, što lubiŭ dziaŭčynku, jak rodnuju dačku, dobra dahladaŭ jaje, a jana nazyvała jaho tatam. «Dziaŭčynka ŭvieś čas na štości chvareła, ja zastavaŭsia ź joj, i joj padabałasia sa mnoj zastavacca», — śćviardžaŭ jon na papiarednim śledstvie.
