Scenaryst i redaktar Len Uejn pamior u ZŠA va ŭzroście 69 hadoŭ. Pra śmierć Uejna paviedamlajuć infarmahienctvy sa spasyłkaj na kampanii DC i Marvel Comics, dla jakich jon stvaryŭ ceły šerah kultavych piersanažaŭ.
Vykanaŭca roli Rasamachi Chju Džekman vykazaŭ u svaim instahramie spačuvańni siamji i siabram Uejna
Len Uejn pačaŭ pracu ŭ DC Comics u pačatku 1970-ch hadoŭ i spačatku pisaŭ scenar dla čarhovych vypuskaŭ pra pryhody Supiermena i Fłeša. Adnak užo ŭ 1971 hodzie Uejn prydumaŭ ułasnaha supierhieroja, jaki staŭ viadomy jak Bałotnaja Pačvara (Swamp Thing).
Na praciahu bolš jak dvaccaci hadoŭ Bałotnaja Pačvara zastavałasia adnoj ź vizitnych kartak DC, adnak sam Uejn u siaredzinie 1970-ch pieraklučyŭsia na pracu na Marvel, dzie staŭ adnym sa stvaralnikaŭ Rasamachi. U 1975 hodzie Uejn adradziŭ sieryju «Ludzi Iks», jakaja była straciła na niekalki hadoŭ papularnaść, dadaŭšy ŭ kamandu niekalki novych piersanažaŭ — Načny Źmiej, Buravieśnik, Navalnica i Kałos.
U kancy 1970-ch Uejn viarnuŭsia ŭ DC Comics, dzie pracavaŭ nad novymi pryhodami Betmena, Cud-žančyny, Zialonaha Lichtara, Chałka i šerahu inšych piersanažaŭ.
U 2008 hodzie Uejn byŭ uklučany ŭ Zału słavy premii Ajśniera, jakaja ličycca najbolš prestyžnaj uznaharodaj u śfiery komiksaŭ.
