Uładzimir Jaromienak u Kurapatach, fota Iryny Arachoŭskaj
Aktyvist «Maładoha frontu» Uładź Jaromienak 8 vieraśnia atrymaŭ sudovuju pastanovu ab vyniasieńni aryštu na 3 sutak za abaronu Kurapataŭ, jakaja była arhanizavanaja aktyvistami suprać budaŭnictva ŭ achoŭnaj zonie naprykancy lutaha - pačatku sakavika 2017 hoda, paviedamlaje spring96.org.
Napiaredadni aktyvistu patelefanavaŭ učastkovy inśpiektar milicyi i nahadaŭ pra vykanańnie sudovaj pastanovy, adnak Jaromienak adkazaŭ, što pakul nie atrymaje jaje asabista, ničoha rabić nie budzie.
Nahadajem, pieršapačatkova administratyŭnuju spravu płanavałasia razhledzieć jašče ŭ sakaviku, adnak tady Uładź Jaromienak utrymlivaŭsia pad vartaj u SIZA na Vaładarskaha, jak padazravany pa spravie «ab padrychtoŭcy masavych biesparadkaŭ». Sud adbyŭsia 26 maja, ale aktyvistu nie paviedamili ni pra datu suda, ni pra vyniki razhladu administratyŭnaj spravy.
U pačatku sakavika, kali padziei vakoł abarony Kurapataŭ nabyli dramatyčny charaktar, niekalki abaroncaŭ atrymali aryšty. Tak, 7 sakavika abaronca Kurapataŭ Siarhiej Palčeŭski atrymaŭ 3 sutak aryštu, a 10 sakavika sud Savieckaha rajona Minska pakaraŭ lidara «Maładoha frontu» Źmitra Daškieviča aryštam na 3 sutak pa art. 23.34 KaAP. 20 sakavika byŭ zatrymany sacyjalny aktyvist Dźmitryj Palijenka. Sud Zavodskaha rajona h. Minska pryznaŭ jaho vinavatym pa art. 23.34 KaAP za ŭdzieł u abaronie Kurapataŭ 25 lutaha i asudziła na 15 sutak aryštu.
.
