Šaścimietrovaha pieŭnia, absypanaha strazami, dasyłali ŭ Halivud pa častkach — u kantejnierach, moram
Try hałoŭnyja pryzy za inavacyi ŭ zabaŭlalnaj industryi na fiestyvalach u Italii, SND i Biełarusi atrymała pryvatnaja firma ź Minska, jakaja vyrablaje i «vychoŭvaje»… dynazaŭraŭ.
Zvyčajnyja šeryja cechi staroha, jašče savieckaha zavoda — navat kampjutary ŭ takim anturažy padobnyja da stomlenych takarnych stankoŭ.
Pryhłušany ryk i dzivosnyja huki ź placoŭki testavańnia nie vyklikajuć ździŭleńnia ŭ ludziej, jaki prachodzić pobač: dynazaŭraŭ siońnia raźviałosia — što pa ŭsioj ziamli, što ŭ Biełarusi…
Bolš za 27 hadoŭ ZAT «Uschodnie-Jeŭrapiejskaja kampanija» robić u stalicy Biełarusi i rassyłaje pa ŭsim śviecie dziŭnych ptušak, źviaroŭ i ich hihanckich prodkaŭ.
Adna z 80 takich małpačak, adpraŭlenych u minułym hodzie ŭ kazino Łas-Viehasa, spakusiła naviedvalnikaŭ: jaje vykrali, šukali z palicyjaj i vyjavili ŭ kampanii za stałom, z kuflem śpirtnoha ŭ ełastyčnych, hnutkich łapkach
Na niadaŭnim mižnarodnym konkursie ŭ Italii «Uschodnie-jeŭrapiejskaja kampanija» ź Minska atrymała «Załatoha poni» — najvyšejšy pryz, svojeasablivy «Oskar» u industryi zabaŭ.
Čym vyłučajucca biełaruskija dynazaŭry?
Dekaracyi i fihury dla centraŭ i parkaŭ zabaŭ robiać pa ŭsim śviecie, i pradukcyja UJEK — nie z tannych. Ale biełaruskija vialikija cacki ceniacca ŭ pakupnikoŭ.
Materyjały i kamplektujučyja dla vyrabaŭ UJEK pieravažna pryvozić ź Jeŭropy, Rasii, Kitaja. «Skura» dynazaŭraŭ — z amierykanskaha silikonu, pakryćcio — z usimi nieabchodnymi siertyfikatami jakaści i biaśpieki (u Biełarusi hetyja impartnyja materyjały prachodziać jašče i ŭłasnuju siertyfikacyju).
«Z usiaho śvietu biarem, ale samaje pravieranaje, jakasnaje i biaśpiečnaje. Formułu, što skupy płacić dvojčy, my asvoili daŭnym-daŭno», — zaŭvažaje Andrej Davydoŭski, hałoŭny inžynier «Uschodnie-jeŭrapiejskaj kampanii».
«Takija materyjały, technałohii kamplektujučych vykarystoŭvajucca va ŭsim śviecie, jość na ŭsich sajtach — niama ničoha sakretnaha. Tut samaje sakretnaje — inžynirynh, dakumientacyja, nami raspracavanaja. Samaje sakretnaja zbroja — našy ludzi, našy śpiecyjalisty», — dadaje Siarhiej Kakareka, namieśnik dyrektara pa vytvorčaści.
U arandavanych cechach u centry Minska i pad Minskam, u Dziaržynsku, pieryjadyčna vykonvajuć unikalnyja zamovy: nie tak daŭno adpravili ŭ Indyju vaśmimietrovaha słana, pakrytaha dziesiatkami tysiač kryštalaŭ «Svaroŭski» i zdolnaha ruchacca, trymajučy raŭnavahu, na vuzkim, maleńkim rovary.
Čałaviek tut naradžajecca ź pienapalistyrołu, a nie z rabra biblejskaha Adama
«Rabić padobnaje ŭ adnym ekzemplary ŭ toj ža Indyi ci Amierycy vielmi doraha, inžynirynh u ich vielmi darahi. Im vyhadniej zrabić na baku. Kitajcy prapanujuć, ale ich vyraby časta chutka psujucca ŭ žorstkich umovach dynamičnaj ekspłuatacyi. Našy — jakasnyja i nadziejnyja», — zapeŭnivaje hałoŭny inžynier.
Akramia taho, što biełaruskija dynazaŭry biaśpiečnyja i «žyvučyja», jany ŭmiejuć «havaryć» i ruchacca, jak nijakija inšyja: sinchronna sa słovami i hukami ruchajucca skivicy, łypajuć vočy, «žestykulujuć»… kaniečnaści
Fiłasofija kazki
U kancy 1990-ch hadoŭ supracoŭniki UJEK trapili na mižnarodnuju vystavu industryi zabaŭ JAAPA ŭ amierykanskim Arłanda. I zrazumieli, što postsavieckija atrakcyjony ŭ parkach kultury i adpačynku, dy i «novyja» hulniavyja aŭtamaty, jakija źjavilisia tady ŭ napaŭciomnych zakutkach, — minułaje stahodździe!
Nieŭzabavie ŭ Biełarusi pačali rabić statyčnyja dziŭnyja fihury i dekaracyi, i adzin sa stvoranych u Minsku dynazaŭraŭ — forma i koler vyvierany pa malunkach encykłapiedyj, kaścianyja zuby, žorstki «pancyr» — hadoŭ 15 tamu adpraviŭsia ŭ Łondan dla pryrodaznaŭčaj ekspazicyi.
«Ale papracavaŭšy paru hadoŭ u statycy, my ŭbačyli, što dzieciam, naviedvalnikam nie chapaje emacyjnaha paryvu. Pryjšoŭ raz, dva — stajać fihury, pryhoža, ale nie bolš. Čym ździvić jašče? Vyrašyŭ zrabić niešta, što b varušyłasia, žyvoje, i zrabili animatronnyja, zaprahramavanyja na kompleksie dziejańniaŭ fihury, pierš za ŭsio dynazaŭraŭ. Bo dynazaŭry — vyjhryšny varyjant z punktu hledžańnia multymiedyjnaj raskručanaści i multfilmaŭ, i filmy ŭžo zrabili dla nas i za nas vielizarnuju rekłamnuju rabotu», — raspaviadaje Alaksandr Łukaševič, namieśnik dyrektara «Uschodnie-Jeŭrapiejskaj kampanii».
Dynazaŭry UJEK stali jarkimi, miakkimi, ruchomymi — kožny, zrešty, sa svaim charaktaram. Jany vučać rabić dabro, pieramahać zło, dapamahać u biadzie — scenary pakazaŭ u minskim parku «Dynazaŭryja» Łukaševič časta prydumlaje sam, pryhladajučysia da nastrojaŭ svaich maleńkich dačok.
Alaksandr Łukaševič časta piša i ahučvaje scenary sam, pryciahvajučy da pracy svaich dziaciej. Ahučka pradstaŭleńnia ŭ «Dynazaŭryi» — šaścikanalnaja
«Heta patrebnyja vychavaŭčaja rabota, rabota praź fiłasofiju kazki. I my možam navučyć našych dynazaŭraŭ «havaryć» na roznych movach — nie prablema, u zaležnaści ad movy našyja śpiecyjalisty adrehulujuć ruch vusnaŭ, skivicy, vačej, chvastoŭ. My robim toje, što nie robić nichto, — ceły vystup, — raspaviadaje Łukaševič.
Ci možna zarabić na dynazaŭrach?
Minski centr «Danazaŭryja», stvorany UJEK, hod tamu na konkursie ŭ Sočy pryznali najlepšym krytym zabaŭlalnym centram u SND (darečy, dla zabaŭlalnaha centra ŭ Sočy da zimovaj Alimpijady «Uschodnie-jeŭrapiejskaja kampanija» zrabiła kazku pa matyvach ruskich narodnych kazak). U budni vosieński viečar — vietrany i mokry — u centr «Dynazaŭryja» pryjšło nie mienš za 300 naviedvalnikaŭ. Viskoča, śmiajecca i skałynajecca kanstrukcyja zapoŭnienaha dziatvoj hulniavoha manieža ź leśvicami, horkami, šarami. Pad huki arkiestra ź lalek-maniekienaŭ viesialacca imianińniki.
Dla dziaciej hraje lalečny arkiestr
Mini-boŭlinh i «kaśmičnaja zona» z załami sučasnych hulniavych aŭtamataŭ i łabiryntam «stralałak» — łaziertah — čakaje tynejdžaraŭ, jakija zamovili sieans. Na najbližejšuju subotu zamoŭlena 24 sustrečy — ad śviata małych da hulańniaŭ darosłych kampanij. Usich raźviaduć pa roznych załach i zonach, «Dynazaŭryja» hatova pryniać adnačasova da paŭtary tysiačy naviedvalnikaŭ. Vyhadny dla naviedvalnika ček — ad 25 dalaraŭ, z hetaj sumy prykładna 10 dalaraŭ dadajecca na kartku hościa ŭ vyhladzie bonusa, a pakinuć zabaŭlalny centr raniej, čym praz čatyry hadziny redka kamu ŭdajecca.
«Dynazaŭryja» ŭ minskim handlova-zabaŭlalnym kompleksie «Civali» pracuje paŭtara hoda i, jak śćviardžaje kiraŭnictva UJEK, voś-voś akupić układzienyja ŭ anturaž i piersanał srodki.
«My ciapier prapanujem pakupnikam našych dynazaŭraŭ voś taki biznes-pakiet — z vytvorčaściu animatarnych fihur, prajektam centra zabaŭ z poŭnym «načyńniem», scenary ŭjaŭleńniaŭ, jakija mohuć być adaptavany da ŭmoŭ zakazčyka. Usio heta — na siaredni kašalok pakupnika. Paviercie, heta bolš vyhadna, čym ŭkłaścisia ŭ banalnuju dyskateku», — zapeŭnivaje Alaksandr Łukaševič.
Pradukcyju pradpryjemstva ceniać va ŭsim śviecie
Pry hetym jon pryznaje: praz kryzis stała mienš zamoŭ z Rasii, Ukrainy, Kazachstana. Syšli vyhadnyja zakazčyki ź Siryi i Livii — pa zrazumiełych pryčynach. Ale ŭ cechach i na test-placoŭcy mieściacca kazačnyja dekaracyi i hieroi, hatovyja adpravicca ŭ Łacinskuju Amieryku, krainy Afryki, šumny Łas-Viehas i Halivud…
UJEK afarmlaje zaraz parki zabaŭ i u haradach Biełarusi — z zabaŭlalnaj i adukacyjnaj prahramaj, kali dabradušnyja, ale z vyhladu hroznyja dynazaŭry hatovyja «raskazać» pra historyju staražytnaha śvietu i svoj nialohki šlach da siabroŭstva z sučasnaj cyvilizacyjaj.