U pošukach źnikłaha 10-hadovaha Maksima Marchaluka siońnia zadziejničany ratavalniki, vajskoŭcy, milicyja, pamiežniki, leśniki, miascovyja žychary i dobraachvotniki, jakija jeduć u viosku Novy Dvor Śvisłackaha rajona z usioj Biełarusi. Na subotu, kali pošuki nie daduć vyniku, pryznačany zbor usich pošukava-vyratavalnych atradaŭ krainy.
— Heta samaja vialikaja pošukavaja apieracyja ŭ našaj praktycy, — kaža kamandzir pošukava-vyratavalnaha atrada «Anioł» Siarhiej Koŭhan, — ludzi jeduć z usioj Biełarusi. Prablema ŭ tym, što dobraachvotnikaŭ šmat, a ludziej, jakija mohuć pravilna arhanizavać ich — niedastatkova. I kali niekalki dzion tamu ludzi pryjazdžali chaatyčna, to ciapier my prosim prybyvać da peŭnaha času. Zbor pošukavych hrup ažyćciaŭlajecca kala budynka sielsavieta ŭ 9:00, 12:00, 15:00 i 18.00. Što tyčycca načnych pošukaŭ, to niepadrychtavanym ludziam lepš u ich nie brać udziełu. Ciapier, akramia pošuku chłopčyka, naša hałoŭnaja zadača — dać biaśpieku dobraachvotnikam, jakija vychodziać u les.
Nahadajem, chłopčyk źnik u Biełaviežskaj puščy ŭviečary ŭ minułuju subotu. Jaho šukajuć užo siomyja sutki. Za hety čas u pošukach pryniali ŭdzieł tysiačy ludziej.
- Na dadzieny momant (10 ranicy 22 vieraśnia) u pošukach zadziejničana 865 čałaviek. Siarod ich — 228 supracoŭnikaŭ MNS, respublikanski atrad śpiecyjalnaha pryznačeńnia MNS, supracoŭniki milicyi i vajskoŭcy. Na miesca vyjechali našy psichołahi, zadziejničana avijacyja, pracujuć dobraachvotniki. Na praciahu dnia ludziej, jakija ŭdzielničajuć u pošuku chłopčyka, chutčej za ŭsio, stanie bolš, — raspaviała TUT.BY aficyjny pradstaŭnik Upraŭleńnia MNS pa Hrodzienskaj vobłaści Natalla Žyvaleŭskaja.
Taksama da pošukaŭ, pa prośbie ratavalnikaŭ, padklučyli bieśpiłotniki NAN Biełarusi.
U hrupach u sacyjalnych sietkach pošukava-vyratavalnych atradaŭ stvorany śpiecyjalnyja internet-dakumienty, dzie kaardynujucca dziejańni tych, chto adpraŭlajecca na pošuki. Tut možna prapanavać svaje pasłuhi ŭ jakaści kiroŭcy, znajści volnaje miesca ŭ mašynie i pieradać pradukty dla tych, chto ŭdzielničaje ŭ pošukach.
— Ahulny zbor atradaŭ pryznačany na vychodnyja nie vypadkova. Tak my možam pryciahnuć da pošukaŭ bolšuju kolkaść ludziej, jakija majuć prafiesijnyja pošukavyja navyki. Varta pamiatać, što vałanciory zajmajucca pošukami dobraachvotna ŭ svoj volny čas, — kaža Siarhiej Koŭhan.
Historyja źnikłaha Maksima mnohich nie pakinuła abyjakavymi. Navat niekatoryja pradpryjemstvy vobłaści adpraŭlajuć svaich supracoŭnikaŭ na pošuki chłopčyka.
Ratavalniki prosiać dobraachvotnikaŭ, jakija jeduć u les, brać z saboj humovyja boty, niepramakalnaje i ciopłaje adzieńnie, pažadana jarkich rasfarbovak
Dapamahčy pošukava-vyratavalnym atradu «Anioł» možna finansava - vydatkaŭ vielmi šmat. Zrabić heta možna pieravodam z bankaŭskaj kartki, taksama zrabić USSD-zapyt dla abanientaŭ MTS * 222 * 13 #. Možna papoŭnić bałans mabilnych telefonaŭ: +375 33 666-68-56, +375 33 666-60-33, a taksama zrabić elektronny płaciož.
