U 2005 hodzie svoj simvał źjaviŭsia i ŭ biełaruskaha rubla — Br. Jon byŭ vybrany z dasłanych na konkurs varyjantaŭ i zaćvierdžany kiraŭnictvam Nacbanka.
Pieramožcy konkursu navat atrymali ŭznaharodu ŭ pamiery 1 275 000 rubloŭ (kala 600 dalaraŭ pa kursie na toj čas).
Tady ž adpaviednaj pastanovaj Nacyjanalny bank rekamiendavaŭ bankam, niabankaŭskim kredytna-finansavym arhanizacyjam, inšym jurydyčnym asobam vykarystoŭvać hety hrafičny znak u jakaści ŭkazańnia na aficyjnuju hrašovuju adzinku — biełaruski rubiel (jak pierad, tak i paśla naminału biełaruskaha rubla) pry vytvorčaści, raźmiaščeńni i raspaŭsiudžańni rekłamy na rynkach tavaraŭ, rabot i pasłuh, infarmacyjnych, daviedačnych materyjałaŭ, a taksama ŭ inšych metach.
Tak źmianilisia b ceńniki ŭ kramach, kali b simvał Br nasamreč vykarystoŭvaŭsia
I voś, z toj pary minuła ŭžo dvanaccać hod, a simvał rubla tak i nie ŭvajšoŭ u naša paŭsiadzionnaje žyćcio. Jaho nie vykarystoŭvajuć ni ŭ kramach, ni ŭ rekłamie, ni navat u samich bankach. Čamu ž tak adbyłosia?
U Nacbanku kažuć pra svajho rodu trend u hetaj śfiery, nie źviazany z zapatrabavanaściu.
«Raspaznavalnyja hrafičnyja simvały histaryčna zamacavalisia za asnoŭnymi suśvietnymi valutami — dalaram, funtam i jenaj. Pry ŭvodzie ŭ abaračeńnie jeŭra taksama byŭ stvorany śpiecyjalny znak, jaki adrazu atrymaŭ šyrokaje raspaŭsiudžańnie. Stvareńnie simvałaŭ «maładych» nacyjanalnych valut stała svojeasablivaj modaj na postsavieckaj prastory, adnak u bolšaści vypadkaŭ hetyja inicyjatyvy nie byli padtrymanyja nasielnictvam i biznes-supolnaściu», — paviedamili «NN» u pres-słužbie Nacbanka.
Miž tym, udałym možna pryznać ekśpierymient z ukaranieńniem simvała rasijskaha rubla, zaćvierdžanaha Bankam Rasii ŭ 2013 hodzie. U Respublicy Kazachstan simvał tenhie byŭ vybrany ŭ 2007 hodzie, ale amal nie vykarystoŭvajecca. Taksama nie atrymaŭ raspaŭsiudžańnia i hrafičny znak ukrainskaj hryŭni, konkurs na vybar jakoha byŭ praviedzieny ŭ 2003 hodzie, i čaściej za ŭsio vykarystoŭvajecca tradycyjnaje skaračeńnie «hrn».
Simvały źleva naprava: hryŭny, rasijkaha rubla i tenhie
Varta adznačyć, što paśla denaminacyi ŭ 2016 hodzie davoli papularnym stała vykarystańnie mižnarodnaha koda biełaruskaha rubla — BYN. U pierachodny pieryjad, kali ŭ abarocie byli adnačasova i staryja, i novyja kupiury, hety kod stali vykarystoŭvać, kab adznačyć, što cana ŭkazanaja mienavita ŭ deminavanych rublach, bo niedeminavanyja mieli inšaje mižnarodnaje abaznačeńnie — BYR. Ale taki kod majuć usie suśvietnyja valuty: USD, EUR, PLN, RUB, AUD i h.d. Jaho vykarystoŭvajuć banki dla praviadzieńnia mižnarodnych valutnych apieracyj.
Simvały ž hrašovych adzinak, abo znaki, pryznačanyja, u pieršuju čarhu, dla chutkaha ŭvodu z kłavijatury ich nazvaŭ i pavyšeńnia paznavalnaści nacyjanalnaj valuty ŭ śviecie.
Moža, nadyšoŭ čas pryniać adpaviednyja zachady dla zabieśpiačeńnia vykarystańnia simvała biełaruskaha rubla ŭ štodzionnym žyćci? Nacbank taki punkt hledžańnia nie padzialaje.
«U suviazi z rekamiendacyjnym charaktaram vykarystańnia hrafičnaha znaka Br Nacyjanalny bank nie ličyć metazhodnym pryniaćcie administracyjnych, a tym bolš zakanadaŭčych mier pa jaho abaviazkovym ukaranieńni. Tamu dalejšaje vykarystańnie i (abo) nievykarystańnie subjektami haspadarańnia i fizičnymi asobami zaćvierdžanaj vyjavy hrafičnaha znaka biełaruskaha rubla nosić dobraachvotny charaktar», — kažuć ŭ pres-słužbie.
A jak ličycie vy? Ci chacieli b vy bačyć i vykarystoŭvać simvał Br zamiest r. i rub. u kramach, rekłamie i aficyjnych dakumientach? Ci varta zakanadaŭča zamacavać abaviazkovaść jaho vykarystańnia?
