U Biełaviežskaj puščy 9-y dzień praciahvajucca pošuki Maksima Marchaluka, jaki prapaŭ u subotu, 16 vieraśnia
Uviečary ŭ niadzielu Tut.by datelefanavaŭsia da kamandzira pošukava-vyratavalnaha atrada «Anioł» Siarhieja Koŭhana, kab daviedacca, što prynios 9-y dzień pošukaŭ.
— Ničoha. Na žal, nijakich novych śladoŭ Maksima ŭ vychodnyja nie znojdziena. Kvadrat pošukaŭ pašyrany, kala 300-400 čałaviek da hetaha času (pa stanie na 18.00) znachodziacca ŭ lesie. Astatnija vałanciory pavoli zhortvajucca i ŭ bolšaści raźjazdžajucca pa damach — zaŭtra budni dzień, ludziam na pracu. Učora i siońnia ludziej karmiła palavaja kuchnia Ministerstva abarony, dziakuj im za heta, - kaža Siarhiej.
Hetaj nočču nad puščaj, jak i raniej, buduć pracavać bieśpiłotniki i viertaloty MNS ź ciepłavizarami — ludziej u les u metach ich ułasnaj biaśpieki nie puściać.
- Niekatoryja vałanciory zastajucca tut dla praciahu pošukaŭ zaŭtra, mahčyma, prybuduć novyja. Zaŭtra, u paniadziełak 25 vieraśnia, zbor dobraachvotnikaŭ u 08.00 kala vykankamu ŭ vioscy Novy Dvor, - paviedamiŭ kamandzir «Anioła».
Pošuki praciahvajucca.
