Łatvija pravodziła na terytoryi Biełarusi inśpiekcyju vučeńniaŭ «Zachad-2017» na płatnaj asnovie, raspavioŭ u intervju prahramie «Kontury» telekanała ANT načalnik Hienieralnaha štaba Uzbrojenych sił Biełarusi hienierał-major Aleh Biełakonieŭ.
Jak raniej paviedamlała Minabarony, padčas vučeńniaŭ pradstaŭniki zamiežnych dziaržaŭ praviali inśpiekcyju vajennaj dziejnaści na terytoryi palihonaŭ Barysaŭski, Lepielski, Łośvida i ŭ rajonie Dretuni.
«Płanavyja inśpiekcyi skončylisia, ale jość takoje paniaćcie — na płatnaj asnovie. Čatyry hadziny lotaŭ viertalot. Adna hadzina viertalota — šeść tysiač jeŭra. Ja ŭjaŭlaju, kolki hrošaj vydzielili Złučanyja Štaty. Ale my hatovy jašče pravodzić takija inśpiekcyi. Nam hrošy patrebnyja», — skazaŭ Biełakonieŭ. Praŭda, adrazu ž udakładniŭ: «Žartuju, viadoma».
Biełakonieŭ prakamientavaŭ taksama ažyjataž, jaki ŭźnik vakoł vučeńniaŭ: pa jaho słovach, niechta na im [ažyjatažy] nažyvajecca, chtości aŭtarytet sabie «takim sposabam napracoŭvaje».
«Jak, skažycie, možna ŭ lasach Biełarusi schavać 60-tysiačnuju vajennuju hrupoŭku, jak niechta tam prydumlaŭ? Uvieś kolkasny skład biełaruskaj armii — 65 tysiač [čałaviek]. Nu jak vy sabie heta ŭjaŭlajecie?» — pacikaviŭsia hienierał-major Biełakonieŭ. Padobnyja «vydumki», na jaho dumku, tolki zhulali na karyść Biełarusi i vučeńniam. — «Ja navat nie čakaŭ, što taki prestyž vučeńniaŭ budzie».
«My pakazali, što my sumlennyja, my pakazali vysoki ŭzrovień transparentnaści našaj dziaržavy … Takoj adkrytaści nie było nikoli. Nivodnaja kraina sabie takoha nie dazvalała. NATA było zaprošana, ABSIE, Arhanizacyja Abjadnanych Nacyj, Mižnarodny čyrvony kryž, SND, ADKB. Vielmi aktyŭna pracavali inśpiekcyjnyja hrupy … Ja prosta nie zajzdrošču tym ludziam, navat što jany buduć pisać, jakija nahniatali stanovišča. Kolkaść vojskaŭ adpaviadała — 12 za 700 čałaviek z dvuch bakoŭ, na terytoryi Biełarusi — krychu bolš za 10 tysiač, — technika - kali łaska. Niahledziačy na kałasalny nacisk, my vykanali pastaŭlenyja zadačy. My na heta nie adciahvali ŭvahu… Ujaŭlajecie sabie, što takoje — čatyry hadziny lotaŭ viertalot. U nas ź Minska da Bresta hadzinu tryccać lacieć… ».
