U internecie raspaŭsiudžvajecca fejkavaja navina, što na 25—27 lutaha 2018 hoda zapłanavany I Paleski kanhres.
Redakcyja «Našaj Nivy» atrymała list, jaki Humanitarna-aśvietnickaje hramadskaje abjadnańnie «Sadružnaść Paleśsia» nibyta dasyłaje svaim siabram u Brest, Pružany, Ivanava, Pinsk i Stolin.
List byŭ dasłany ź vidavočna niesapraŭdnaha paštovaha akaŭnta [email protected]. «Šanoŭnaja redakcyja, da vas źviartajecca stały čytač z Bresckaj vobłaści, litaralna rankam mnie siabra dasłaŭ cikavuju infarmacyju, jakuju ja pierasyłaju vam, bo jość tema, jak minimum raspytać, ci heta praŭda. Znoŭ pačałasia praca pa Paleśsi, heta kiepskaja prajava, nie treba tut novaj «spravy Šalahoviča», a jon tam uzhadvajecca!» — napisaŭ «dobrazyčliviec».
Pra što ž viadziecca havorka ŭ liście? «Infarmujem Vas, što 25-27 lutaha ŭ Pinsku adbudziecca I Paleski kanhres. Arhanizacyjaj i praviadzieńniem mierapryjemstva zajmajecca HAHA Sadružnaść Paleśsia. U suviazi z hetym prosim Vas da 1 śniežnia ŭklučna paviedamić pra Vašaje žadańnie dapamahčy ŭ arhanizacyjnych momantach. Da 1 lutaha 2018 hoda, kali łaska, padajcie śpisy ŭdzielnikaŭ ad vašych rehijanalnych adździaleńniaŭ. Aryjentujciesia, što ad kožnaha rehijona nie bolej 20 čałaviek», — havorycca ŭ hetym zvarocie.
Jakija ž pytańni musiŭ razhledzieć «paleski kanhres»? Zrabić hetaje mierapryjemstva štohadovym, adradzić vydańnie haziety «Zbudińnie», stvaryć hrupy pa praciahu pracy nad paleskim ałfavitam, stvaryć arhkamitet i statut hramadskaha abjadnańnia «Kulturnaja aŭtanomija Paleśsia».
Mabyć, apošni punkt najbolš supiarečlivy i nieadnaznačny ŭ hetym pieraliku. U 90-ja ŭžo byli sproby abvieścić paleskuju aŭtanomiju, hetyja zachady aktyŭna prapahandavaŭ Mikoła Šalahovič. Vielmi nieadnaznačny piersanaž, jaki ciapier žyvie ŭ Kalininhradzie.
Padajucca numary telefonaŭ nibyta arhanizataraŭ kanhresu. Siarod ich pinčuk Źmicier Kisiel, kiraŭnik «Sadružnaści Paleśsia». My spytali ŭ jaho, ci sapraŭdy rychtujecca padobnaje mierapryjemstva?
Źmicier Kisiel. Fota — Alaksandr Ždanovič, budzma.by
«Nijaki kanhres my nie sklikajem, — kaža nam Źmicier Kisiel. — Heta čarhovaja sproba pryciahnuć nas da niejkaj «paleskaści». Ad momantu rehistracyi našaj arhanizacyi iduć niejkija dziŭnyja prapanovy, to pravieści źjezd palešukoŭ, to niešta ab paleskaj aŭtentyčnaści. Ja razhladaju hety list jak čarhovuju pravakacyju. Kamuści vielmi chočacca ŭciahnuć nas u hetaje «palašuctva», a ŭ našaj naźvie prosta akreślivajecca hieahrafičny rehijon. Niechta nakidvaje na nas taŭro «rehijanalščykaŭ», «niestabilnaha rehijona». Nasamreč my ž zajmajemsia narmalnaj prabiełaruskaj spravaj».
Admietna, što ŭ liście paznačany ceły šerah asobaŭ, jakija nibyta pahadzilisia pryniać udzieł u jakaści hanarovych siabroŭ kanhresu z pravam hołasa. Siarod ich movaznaŭca Fiodar Klimčuk, kiraŭnik bresckaj ukrainskaj supołki «Bierahinia» Viktar Misijuk, bresckaja dziejačka polskaj mienšaści Alina Jaraševič, Mikoła Šalahovič, Jaŭhien Niparka z Polščy, namieśnik staršyni ŁDPB Aleh Hajdukievič, piśmieńnica Natałka Babina.
Apošniaja hetak prakamientavała navinu pra «sklikańnie» paleskaha kanhresu: «Ja daviedałasia pra hety list ad «Našaj Nivy». Składana skazać, chto za im staić. Mahčyma, Mikoła Šelahovič. Ideja hetaha biezumoŭna talenavitaha čałavieka — ci inśpiravanaja praź jaho KDB SSSR — ideja paleskaj «Jetvyzi» u svoj čas nie zdabyła šyrokaj padtrymki ŭ ludziach».
«Ale jana hruntavałasia na nieabvieržnym fakcie: na fakcie moŭnaj i kulturnaj asablivaści niekatorych rehijonaŭ Bresckaj vobłaści. Mienavita hetaja asablivaść i pryciahvała tady aktyvistaŭ. Ale asablivaść hetaja — nie ŭjaŭnaja «jaćviažskaja». Heta miortvaje. I heta tolki na škodu pabudavańniu biełaruskaj dziaržavy. Praŭda ŭ tym, što karennyja žychary dobraj bolšaj pałovy Bresckaj vobłaści havorać pa-ŭkrainsku — na ukrainskich havorkach, chacia mnohija navat hetaha nie ŭśviedamlajuć, — pierakonvaje Babina. — I sprava biełaruskaj dziaržavy — jak da hetaha stavicca».
Aleh Hajdukievič taksama ničoha nie viedaŭ pra paleski kanhres. Pa jahonych słovach, jon dobra viedaje asobu Źmitra Kisiala, jaki šmat dapamahaje ŁDPB u Pinsku. «Ja viedaju, što Kisiel niadaŭna atrymaŭ kiraŭničuju pasadu ŭ Paleskim zapaviedniku. Mahčyma, z hetym źviazana dziejnaść niadobrazyčliŭcaŭ», — dzielicca dumkami Hajdukievič.
Jak bačym, navina pra sklikańnie paleskaha kanhresu akazałasia poŭnaj falšyŭkaj. Sami ludzi, jakija nibyta za hetym stajać, rašuča abviarhajuć infarmacyju. Ale naściarožvaje toje, što źjaŭlajecca niechta, chto choča naviazać aktyvistam Bieraściejščyny niejki «sieparatyzm».
