Uviečary 1 kastryčnika homielskija milicyjanty prybyli na 5 słužbovych mašynach da kramy «Akijan», što na vulicy Kožara.
Uviečary intensiŭnaść ruchu tut nizkaja, i žychary cotnaha boku vulicy Kožara zvyčajna pierachodziać darohu prosta nasuprać kramy. Supracoŭniki PPS spačatku zdymali parušalnikaŭ na videa, a zatym zatrymlivali ich da prybyćcia ekipažaŭ DAI.
Tak, naprykład, žychar doma pa vulicy Kožara, raźmieščanaha nasuprać kramy, nakiroŭvaŭsia pa cukierki dla dački i byŭ spynieny patrulom pry pierachodzie vulicy. Jon atrymaŭ dazvoł usio ž kupić prysmaki, pakul jedzie ekipaž DAI. Pry hetym kramu jamu daviałosia naviedvać u supravadžeńni dvuch supracoŭnikaŭ milicyi, adzin ź ich byŭ uzbrojeny aŭtamatam AKS-74U, paviedamlaje miascovy partał gomel.today.
Usiaho na miesca zatrymańnia prybyło piać mašyn DAI i PPS, a taksama kinołah sa słužbovym sabakam.
Supracoŭniki PPS na pytańni hramadzian, čamu jany stali zajmacca nieŭłaścivaj im raniej dziejnaściu, adkazvali, što jany abaviazany spyniać lubyja parušeńni hramadskaha paradku. Štraf za pierachod vulicy ŭ nienaležnym miescy nakładajecca supracoŭnikami DAI paśla składańnia adpaviednaha pratakoła. Jak praviła, pry pieršym parušeńni jon składaje adnu bazavuju vieličyniu — 23 rubli.
