25 vieraśnia 68-hadovy haradzieniec Siarhiej Dźmitryjevič znachodziŭsia ŭ reanimacyi ankałahičnaha adździaleńnia abłasnoj balnicy. Paśla apieracyi ŭ jaho spyniłasia serca, ale daktary zmahli reanimavać dziadulu.
Dalejšyja padziei apisvaje partał newgrodno.by sa słovaŭ svajakoŭ Siarhieja Dźmitryjeviča.
Paźniej, a pałovie na čaćviortuju rodnym patelefanavali i paviedamili, što Siarhiej Dźmitryjevič skanaŭ. Svajaki pryjechali ŭ balnicu, zabrali rečy dziaduli, pačali rychtavacca da pachavańnia.
Na nastupny dzień zvanok z balnicy zaśpieŭ udavu ŭ rytualnym biuro. Joj paviedamili, što Siarhiej Dźmitryjevič… žyvy. Usioj siamjoj svajaki pajechali ŭ balnicu.
Daktary paviedamili, što chvory byŭ u prytomnaści i na pytańni adkazvaŭ, matajučy hałavoj. Adnak da pacyjenta nikoha ź blizkich nie puścili — jon znachodziŭsia ŭ reanimacyi, a tudy jość dostup tolki ŭ piersanała. Unučka razam z žonkaj «ŭvaskrosłaha» viarnulisia dadomu.
Ale nie paśpieli rodnyja adśviatkavać ŭvaskrašeńnie ich dziaduli, jak ranicaj 27 vieraśnia žoncy iznoŭ pastupiŭ zvanok balnicy. Telefanavali z reanimacyi: «Siarhiej Dźmitryjevič pamior. I ŭžo dakładna pamior u 7:00 27 vieraśnia 2017 hoda».
Svajaki zadajucca šeraham pytańniaŭ: dzie znachodziŭsia «pamierły» z 15:30 chvilin 25 vieraśnia da 9:08 chvilin 26 vieraśnia? Kali jon znachodziŭsia ŭ reanimacyjnym adździaleńni, čamu im paviedamili, što chvory «ažyŭ» tolki ranicaj 26 vieraśnia 2017 hodu? Paśla apieracyi, kali dziadulu pryznali pamierłym, jaho adklučyli ad aparataŭ?
Na hetyja pytańni ŭ balnicy nichto nie moh adkazać. U balnicy pajšli razmovy, što «kartka była ŭ morhu, a morh pracuje da 17:00, i ŭ ich nie było nijakich kantaktnych dadzienych svajakoŭ pamierłaha». Ale takaja zdahadka nie viažacca z łohikaj: pry pastupleńni čałavieka ŭ balnicu ŭsia infarmacyja unosicca ŭ bazu dadzienych u kampjutary, kudy zapisvajuć u tym liku i numary telefonaŭ blizkich.
U suviazi z hetym, u siamji niabožčyka jość viersija, što žyvy čałaviek znachodziŭsia ŭ morhu, i tolki pry ŭskryćci na nastupnuju ranicu miedrabotniki vyjavili, što jon žyvy.
Svajaki Siarhieja Dźmitryjeviča napisali aficyjny list hałoŭnamu doktaru balnicy. I im udałosia navat ź im krychu pahutaryć. Hetuju situacyju jon prakamientavaŭ ścipła, spasłaŭšysia na toje, što byŭ u kamandziroŭcy i całkam situacyjaj nie vałodaje. Tamu źbiare kansilium, paśla jakoha daść adkaz na ŭsie pytańni ŭ zvarotnym liście. Taksama hałoŭny doktar prynios asabistyja prabačeńni.
Hałoŭny doktar balnicy Jury Piacielski paviedamiŭ «Našaj Nivie», što daŭ kamientar hrodzienskamu partału s13 i bolš jamu niama čaho dadać. Pryvodzim jaho zajavu całkam.
«Pacyjentu, jaki pakutuje na ankałahičnaje zachvorvańnie z najaŭnaściu množnaj spadarožnaj patałohii, było vykanana płanavaje apieratyŭnaje ŭmiašańnie, padčas jakoha zdaryłasia spynieńnie sardečnaj dziejnaści, što zapatrabavała reanimacyjnych mierapryjemstvaŭ. U paślaapieracyjnym pieryjadzie ŭ adździaleńni reanimacyi zdaryłasia spynieńnie sardečnaj dziejnaści, pravodzilisia praciahłyja reanimacyjnyja mierapryjemstvy, jakija byli małaefiektyŭnymi. U chodzie reanimacyjnych mierapryjemstvaŭ chirurham była daviedziena svajakam niedakładnaja infarmacyja pra śmierć pacyjenta i nie była im svoječasova asprečanaja.
Paśla praviedzienych reanimacyjnych mierapryjemstvaŭ adnaviłasia sardečnaja dziejnaść, paźniej adnaviłasia śviadomaść, što śviedčyła ab efiektyŭnaści reanimacyjnych mierapryjemstvaŭ. Pacyjent až da kanstatacyi śmierci 27.09.17 znachodziŭsia ŭ adździaleńni reanimacyi, dzie jamu pravodzilisia intensiŭnaja terapija i paŭtornyja reanimacyjnyja mierapryjemstvy. Pra heta śviedčać zapisy ŭ miedycynskaj dakumientacyi i praviedzienyja šmatlikija dyjahnastyčnyja mierapryjemstvy.
Administracyja balnicy prynosić najhłybiejšyja prabačeńni svajakam i blizkim za niedakładnaje infarmavańnie chirurham ab fakcie śmierci pacyjenta i niasvoječasovym asprečańni faktu śmierci. Administracyja balnicy prynosić spačuvańni z nahody śmierci blizkaha čałavieka.
U ciapierašni čas praciahvajecca słužbovaje rasśledavańnie, ab vynikach jakoha i pryniatych mierach svajaki buduć infarmavanyja piśmova».