Jeŭrapiejski parłamient niehatyŭna acaniŭ biahučyja pieramovy pamiž Brusielem i Łondanam adnosna «breksitu». Jeŭradeputaty pryniali rezalucyju, u jakoj jany paličyli, što prahresu ŭ pieramovach niedastatkova. Heta aznačaje adsutnaść zhody pačać pieramovy ab budučyni handlovym pahadnieńni, jakoje vielmi važnaje dla Vialikabrytanii. Rezalucyja była pryniataja pieravažnaj bolšaściu hałasoŭ, paviedamlaje Radyjo Polšča.
Deputaty Jeŭraparłamienta pryznali, što jeŭrapiejskija lidary na samicie ES, jaki adbudziecca praz dva tydni, nie pavinny davać zialonaje śviatło pačatku pieramovaŭ ab budučyni kamiercyjnym partniorstvie, chiba što ŭ hetym miesiacy adbudziecca realny praryŭ u pieramoŭnym raŭndzie. Jeŭradeputaty taksama raskrytykavali roznahałośsi ŭ brytanskim uradzie ŭ dačynieńni da «breksitu» i zajavili, što heta ŭskładniaje dasiahnieńnie kampramisu.
Samyja vialikija razychodžańni pamiž Brusielem i Łondanam źviazanyja ź finansavymi abaviazalnictvami. ES čakaje, što Złučanaje Karaleŭstva, niahledziačy na «breksit», praciahnie płacić u biudžet ES da 2023 hoda, Łondan nie zhodny prymać hetuju ŭmovu.
«27 krain nie mohuć apłačvać rachunki, uzhodnienyja 28 dziaržavami», — skazaŭ lidar libierałaŭ u Jeŭraparłamiencie Hi Vierchofstat padčas debataŭ.
Pytańnie ab zabieśpiačeńni pravoŭ jeŭrapiejcaŭ na terytoryi Vialikabrytanii paśla «breksitu» taksama całkam nie vyrašanaje.
