Black Swan
Brytanski viaskovy pab staŭ najlepšym restaranam u śviecie pa viersii resursu dla padarožnikaŭ TripAdvisor. Pieramožca byŭ vyznačany na asnovie miljonaŭ vodhukaŭ na sajcie za apošni hod.
Brytanski restaran upieršyniu vyjšaŭ na pieršaje miesca z momantu zasnavańnia premii ŭ 2012 hodzie.
Pab Black Swan («Čorny lebiedź»), jaki ŭžo maje adnu mišlenaŭskuju zorku i čatyry prestyžnyja ŭznaharody AA Rosette, — siamiejny restaran u horadzie Ołdsted u Paŭnočnym Jorkšyry.
Im kirujuć šef-kuchar Tomi Benks, jaki staŭ čatyry hady tamu samym maładym u Brytanii uładalnikam zorki «Mišlen», i jaho brat Džejms.
«Dla mianie vialiki honar atrymać hetuju ŭznaharodu, i asabliva važna, što jana była prysudžanaja dziakujučy vodhukam našych klijentaŭ», — zajaviŭ Benks.
Tomi Benks
Da hetaha na praciahu dvuch hadoŭ tytuł najlepšaha restarana atrymlivaŭ Martín Berasategui ŭ Ispanii.
TripAdvisor tłumačyć, što jaho ŭznaharoda adroźnivajecca ad astatnich, bo prysudžajecca na asnovie vodhukaŭ naviedvalnikaŭ, a nie hruntujecca na mierkavańni nievialikaj hrupy sudździaŭ.
Rejtynh restaranaŭ TripAdvisor
- Black Swan, Ołdsted, Brytanija
- Belmond Le Manoir aux Quat'Saisons, Hrejt Miłtan, Brytanija
- Maison Lameloise, Šani, Francyja
- L'home Auberge de l'ouest Ill, Iljaezern, Francyja
- Martin Berasategui, Łasarte, Ispanija
- Daniel, Ńju-Jork, ZŠA
- La Colombe, Kanstancyja, PAR
- David's Kitchen, Čyjanhmaj, Tajłand
- Maido, Lima, Pieru
- El Celler de Can Roca, Žyrona, Ispanija
Zrešty, uznaharody, jak akazałasia, nie zaŭsiody radujuć šef-kucharaŭ. Try tydni tamu adzin z samych viadomych francuzskich kucharaŭ paprasiŭ prybrać jaho restaran sa śpisu «Mišlen».
46-hadovy Siebaśćian Bra patłumačyŭ, što choča hatavać vydatnuju ježu biez pastajannaha ažyjatažu i turboty praz toje, što ananimnyja sudździ «Mišlen» mohuć nalacieć ŭ luby momant.
Bra kiruje restaranam Le Suquet z tryma zorkami «Mišlen» u francuzskaj kamunie Łajol.
Składanyja adnosiny z hidam «Mišlen» skłalisia i ŭ ispanskaha restarana Casa Julio, jaki ŭ 2014 hodzie z druhoj sproby taksama admoviŭsia ad svaich zorak. Šef-povar Chulia Bijoska tłumačyŭ, što ŭklučeńnie ŭ hid «Mišlen» spałučanaje z zanadta vialikim ciskam.
Bielhijski kuchar Frederyk Duh taksama viarnuŭ mišlenaŭskuju zorku ŭ 2014 hodzie, zajaviŭšy, što choča być svabodnym ad rejtynhaŭ.